طلبتيني

وسمي وأبشري يا نور عيني جاك
على رد الطلب ما أقدر ولا أحاول ولا أستجري
أنا ذكراي شخصك والحكي عنك وحبي هاك
خذي حبي خذي قلبي خذي روحي خذي أمري
سنيني اللي مضت يا دنيتي وما تحتويه فداك
مسحناها ولا غيرك بقا بالقلب والفكري
بداية عمري وعمرك نهاية عمر ذاك وذاك
ولا غيرك سكن قلبي ولا غيرك علي بيطري
أبيع الناس لعيونك وأبيع الروح لمحياك
ولا تحكيلي على قدرك ولا أحكيلك على قدري
شبكنا بالمحبة واشتبكنا قبلها بمشباك
عروق الدم من تحت اللحم ما بيننا تجري
لك استنيت لين أزريت يا وجه القمر حياك
تمهل ياقمر خمسة عشر بالله لا تسري
تراني يا قمر مثلك ويسري بي الهوى مسراك
يا ليتك ثابت مثل الجدي ونورك بدا بدري
وعلى نورك يصير الحلم علم وحلمي بلقياك
بدا بأبيض بعده أخضر وصار نهايته زهري
ولقيتك ماضي أيامي ولا حاضر بقلبي سواك
وصرتي أنتي القمر والحلم وألوانه وأنا مدري
عسى ربي يجملني ونال ردي رضاك
وعسى ربي يطول بعمرك يا بعد عمري