الشوق

قلبتها في راسي اخماس واسداس
لكنها عيت تجيني على الكيف
البارحة كني موقف على فاس
ومحتر كني مشعلٍ داخلي ليف
لا طاب لي نومٍ ولا طاب مجلاس
ولا طاب لي شوف العرب والسواليف
ماكنت احسب ان الغلا يذبح الناس
وسلمت روحي في يدين المواليف
وما كنت اظن الهم ينصب في كاس
الين سالت به عيوني مذاريف
وما كنت احسب اني من البعد حساس
حتى رماني موج فرقاه للسيف
المشكلة في الحب ماهيب في الراس
المشكلة في قلبي وقلبي ضعيف
كل مالطم وجهي من الشوق نسناس
بيبان دمعاتي عليهم مساييف
مايقطع الرجوى ولا يبدي الياس
اللي في حبه ماجهل في المعاريف
انا بنيت اللي بنيته على ساس
يامعزبه ليتك تجي له ولو ضيف
الى متى اصبر على كل هوجاس
والى متى وانا حديث الملاقيف