نايف لاجل دينه وشعبه تفانا

غاب وتوارى نجمنا عن سمانا
الغيبه اللي ماوراها نكايف
الله يصبرنا ويجبر عزانا
والله يعض بخير في فقد نايف
نايف لاجل دينه وشعبه تفانا
وقف بوجه اللي على الدين حايف
وسخر حياته للوطن ما توانا
ما حسب حساب التعب والكلايف
رجل الأمن لأول وحامي حمانا
يرسي كما ترسي الجبال النوايف
ويقلط على الكايد عيانا بيانا
ويجعل من ثقال البلاوي خفايف
عضيدنا في المعضلات وذرانا
ومضمد جروح الكبود النزايف
يفرح به أصحاب القلوب الحزانا
ويامن به اللي من قسى الوقت خايف
غلاه يجرى في مجاري دمانا
وحبه سكن بين الضلوع النحايف
يالله عسى مثواه عالي الجنانا
مع النبي وأصحاب بيض الصحايف
وحنا يا أبو متعب نجدد ولانا
حنا لكم مثل السيوف الرهايف
نحمي عقيدتنا وونفدي ثرانا
ما همنا الموت الحمر والحتايف
ونفلك بنادقنا ونشقر عصانا
بوجيه راعين العقول السخايف
اللي يحوكون الخطط من ورانا
مقسومهم منها الندم والحسايف
مبارك بن محمد آل مسعود القحطاني