بقلوب شعبه له محبة ومسكان

البارحه عن لذة النوم سهران
والشعب مثلي ما اهتنى في منامه
الفكر في بحر التفاكير غرقان
والجسم عيت لا تشيله عظامه
بعد فقدنا راعي الجود سلطان
فقيد الامه والعرب والزعامه
سلطان ينبوع الكرم طير حوران
للطيب في وجهه رسوم وعلامه
سلطان يبكونه فقارى ويتمان
هو فزعة اللي جاير الحمل ضامه
سلطان هامة عز في صورة انسان
سلطان خير ما تغير نظامه
هو والكرم دايم قرنين واخوان
الله جمع فيه الكرم والشهامه
انا اشهد انه بالعرب عالي الشان
وانه كسب في المجد ذروة سنامه
يبكي عليه الشعب حضر وبدوان
ويبكي عليه طويق هو اليمامه
بقلوب شعبه له محبه ومسكان
حبه بنى بقلوب شعبه خيامه
حتى الرضيع اللي يضمه بالاحضان
يقول احبك قبل سن الفطامه
اعزي أبو متعب ونايف وسلمان
والشعب واخوانه مع ابناء عمامه
يا الله عساه بجنة الخلد سكان
في جنة الفردوس عال مقامه
ويا الله عسى قبره رياض وبستان
وتهل من فوقه مزون الغمامه
وصلاة ربي عد همال الامزان
على شفيع الناس يوم القيامه
سهل بندر المقاطي