الله من قلب تزايد هجوسه له مدة ما هوب يم الوناسه يسج وادنى ما طرا له يحوسه مدري وش اللي بالتفاكير حاسه غديت انا ويا الهواجيس حوسه كني على حد الزمن في حراسه الوضع مزري والحلول معكوسه والحلم يكبر ما لقينا مقاسه لو تزرع خياره طلع فيه كوسه ما عاد ينفع جهد والا سياسه من طاح حظه دوم بقعى تدوسه تكسيه من رجله ليا حد راسه الوقت يمضي بس تبقى دروسه كلن عليه من التجارب دراسه طبع الليالي والليالي نكوسه لو اقبلت في تاليتها انعكاسه ما هي من اللوعات دوم محروسه ما تنومن للغدر فيها انتكاسه احد بها يشقى ويجمع فلوسه يخاف من هم الفقر والفلاسه واحد يجي تزهاه ناعم لبوسه مرتاح ما يشقى وجوه وناسه معطيته الدنيا على طول بوسه ما ذاق يوم فيه لحظة تعاسه واحد يجاهد ما سلم من نحوسه مع قل توفيقه تصيبه نحاحسه يلقى الليالي قدم وجهه عبوسه تضغط عليه بكل حقد وشراسه ما عنده الا ما يوقي ضروسه واحيان ما عنده من العيش طاسه كن الخناجر في ظهره مغروسه من قل دخله واصل حد ياسه احد على عرش الكرامه جلوسه الطيب عوده والشهامه لباسه وفيهم طويل الباع مبعد رموسه في ساحة الميدان ياقو باسه واما قصير الباع نفسه يؤسه مستور حال وعايش وسط ناسه وفيهم عديم الراي حرمه تروسه ما فيه فود ولا تغرك حساسه واللي اكل عرض المقفين سوسه يسقيك سم الداب في وسط كاسه تحت الوفا والنصح يخفي دسوسه نقال هرج وكل شغله بلاسه هذي وصوف ظاهره ومحسوسه والفرق واضح ما يبي له فراسه
