كل عاشق يشرح شعوره

كل عاشق يشرح شعوره ويجعلها هجوس=والذي يقدر على التعبير تستعذب هجوسه
اما انا تبقى هجوسي داخل الخاطر عبوس=ماقدرت استجدي الخاطر ولا أمنع عبوسه
بين عقلي وبين قلبي مثلما حرب البسوس=يستحيل استذكر التاريخ دون اذكر بسوسه
وبين قلبي والعروق النابضه جروحن يبوس=تمنع التوصيل فيما بينهم وايضا تحوسه
ودي ان الهم يخلع مثلما خلع الضروس=يستريح اللي خلع ضرس الألم من شر سوسه
بين فكري الحي والتنفيذ تتعاكس تروس=والتعاكس يكسر الوجدان ويحطم تروسه
خوفي اني عشت تايه من عكوسن في عكوس=مادريت الخير يمي والا توي من عكوسه
الله اعلم بالخواطر والذي تخفي النفوس=والله اللي يرزق الصياد من سهمه وقوسه
المزون الساكبه تروي الشجر تحيي الغروس=والدموع العاشقه يفرح بها الحب وغروسه
والمحبه ماتقدر بالمكانه والفلوس=كم غني ماذاق حبن غير في خزنة فلوسه
المحبه كنز غالي دون لمسه طاح روس=والمحبه نبع صافي والشقي يحرم كؤوسه
لا حبيب بلا حبيبه ولا عريس بلا عروس=ولا قتال بدون سيفن يحترم نصله وموسه
والنهايه خاطري يهمس بما يخفي هموس=لو قدرت افهم رموز الهمس ماخفيت دروسه
مايطيق الحب غير اللي على جرحه يدوس=ولا يموت الا الذي يهاب جرحه ما يدوسه