بقايا الأمس

والقلب في راسك تبيّح كنينه
الله لا يسقي مفاليك عامين
ذكرتني راعي الطبوع الحسينة
مرحوم يا اللي جهزوا يوم الأثنين
العصر من فوق النعش شايلينه
حطوا على خلي من الطين زافين
حطوا عليه اللبن وملحدينه
يا ليت كفي حدر خده عن الطين
والكف الآخر فوق صافي جبينه
أو ليت يومي قبل يومه بيومين
ولا المرض ما بيننا قاسمينه
لا يا حياة الشر عقب أريش العين
لا وهني من شافنا تابعينه
شربت لي من صافي الغبن كاسين
هذا معاليقي وكبدي متينه
قالوا علامك عشرك اليوم ثنتين
قلت اعذروني زين الأطباع وينه
قالوا تخيّر بالبنات المزايين
قلت العذارى غيرها منكرينه
قالوا عجوز وقلت وافالكم شين
الخمس والعشرين قيمة سنينه
وجدي عليها وجد راعي بعارين
ممسىٍ خلاوي والسرق حايفينه
هن راس ماله واشلعوهن شياطين
وأصبح على الجرة يفرك يدينه
أو وجد من لحقوه طلابة الدين
صكة عميّ القايله مطلبينه
لحقوه عكفان الشوارب مغلين
وتشاوحوه بكل شلفا سنينه
جديع بن سودان العنزي