عواكيس

** الحبيب الغالي معوكس
تحية وبعد
أنا ودي أعرف وش يبي بسيرو بصاحب العبدالله بصراحة مستواه الفني متواضع.
صديقك/ صالح الدفاية - الخرج
- والله ولا تهون يا بو دفاية لو صبروا الربع شوي نسقه الأهلي نهاية الموسم!!.
** صاحب المليون رسالة معوكس
تحية طيبة وبعد
ياخي وش ذا الحظ مع الشهراني لو يطيح من السيكل بلنتي
محبك/ عبدالرحمن الضويان - العليا
- أبو حميد يستاهل شارة القيادة مع منتخب السباحة خاصة انه يطب صاروخ!!
** عزيزي معوكس
بعد السلام والتحية
هل تتوقع أن يستمر المهاجم الكوري سول مع الهلال الموسم المقبل
صديقك/ عبدالعزيز فلنج
- يستمر صعبة وهو كنه «حصان» ما غير يركض والنهاية في المركز الأخير!!
** الصديق الوفي معوكس
بعد التحية والتقدير
معقولة ولا لاعب من النصر العالمي في المنتخب
بندر العصاي - عنيزة
- معقولة ونص اللاعبين عالميين وطموحهم منتخب العالم!!
** الصديق الخاص معوكس
تحية محبة و تقدير وبعد
وش رأيك في عواجي حكم لقاء النصر وأبها
عبدالرحمن أبو عيون
- شكله طقها صافرة وصارت «عوجاء» والحسابة بتحسب بلنتيات!!
** هلا يا معوكس
مساء الاحساس والطيبة
وشلون الشوف عندك شكل نظارتك كأنك مهندس لحام
منصور سيرلانكي
- الشوف شجر كنه حديقة الفوطة!!
** الحبيب الوديع معوكس
بعد التحية
ليش انت ضد النجم الكبير فهد مبارك
صديقك - عبدالرحمن أبو خشة
** الله يستر ما يتوهق البلجيكي ويشوفه في التمرين كنه ميسي ويرجعه أساسي!!
*يابوالعواكيس يسعدلي صباحك عن جد انا حزين!! انقرضت عندنا الارانب والجرابيع والضبان وام سالم والكنغر والورر والرمث والقشع وكله بفعل البعض بالبيئه،،،، /صديق البيئه والحياه الفطرية
- بلغ عن المخالفين يا صديق الضبان!!
**تحية وتقدير لك يا ابوالعواكيس ومبروووك مقدماً تأهلنا لكأس العالم 2010 وش قصة بيسيرو و محمد نامي بوصفه لاعب اجنبي ؟
سليمان الربيع - خطامة سدير
- قصة بسيرو تعرفطت مع الكرفتة قدام الامارات!
** صديقنا معوكس هل عددجماهير ايران بمباراه السعوديه الاخيره تجاوز المئه الف ومارأيك بالمدرب(علي دائي) وشكرآ / بندرالقبيشي وباسل القبيشي
- دائي قاله بسيرو فين التحدي يا دائي!!
**عزيزي معوكس أنتبه لاتغلط علي لمعلوميتك تراي نشيط مع إحترامي وتقديري لك. لواعطيك رفسه مع بقس والله إن تخلص علبة فقس وتشوف الجريدة معكوسه وتقول عالبطاطه كوسه/
أخوك من رفيعةبريدة حمدالتويجري[ابوعبدالله] تعاون وبس وغيره خس
- تعاون وبس وإدارته ازعجتنا بالتصاريح وآخرتها هزايم!!
**صباح الخير أبو العواكيس أخوك هلالي 24ساعه يقولون أن سول أشترط على الهلاليين أن يلعب المباريات بالنهار لكنهم أخلوا بالشرط مما أثر على مستواه أنت وش رايك يالذيب/
حسن المالكي من جدة
- بالنهار بالليل بين العشاوين ما فيه حيلة شاعر العريجا!!
** معوكس ياحلو واحد مسوي فيها ذكي سأل طقاقه كم لك تطقين؟ قالت من عشر سنوات قال ياااااه من عشر سنوات ومحد فتحلك !!!! شرايك فيه؟
بدر اليعقوب - القيصومة
- مايحتاج عادل إمام
**السلام عليكم ورحمة الله وبركاته . حبيبي معوكس حسن ربيع جابوله حلوى ما نفع وجابوله مندي العريجا وما نفع ولا أدري وش ينفع به وشكرآ . تكفى بدون ملفات حواري أخوك
(علي الخيبري - الرياض)
- يجربون المثلوثة!!
** إلى الأستاذ الرائع معوكس . بعد التحيه ما رايك بالنجم الملك دل بييرو ؟وهل تشعر أن فريق اليوفنتوس قادر على الفوز ببطوله الإسكتديتو الإيطالي ؟ تحياتي لك
/يوسف الوابل .. تورينو
-حسب المؤجلات!!
** السلام عليكم صباح الفل والياسمين صديقي العزيز معوكس عندي سؤال محيرني من زمان أبي اعرف بصراحه ميولك الرياضي لأي نادي وتحياتي لك.
الأسير - الرياض
- تلقاه على موقعي الإلكتروني دوت كم!!
**صديقي معوكس المحترم وش رايك توسط لناعند رئيس الهلال يعيرسول لنادي كميت مجانا.
صديقك معاذ الحميد - مرات
- شكل عندكم نهائي سوبر الوشم!!
** أخ معكوس مارأيك كنا نصور عامودا من الكهرباء قد سقط من العاصفه فجاء صاحب الفلاشات يتركز بجانب العامود لتظهر صورته
اخوك محماس..
- حظه ان العمود ما سقط على راسه!!