لا والله إللّي شدّوا البدو يا بداح

شدّوا وانا ياخوي مالي مراحي
من عقبهم يابداح ما نِيب مرتاح
الله لا يقْبَل سواد المراحي
ياضيقةٍ بالصدر ماعاد تنزاح
ماعاد يمحاها من الصدر ماحي
حطّيت لي عن ضيقة الصدر مسباح
وأوْمَيت به حتى تقطّع وْطاحي
أثر الخرز ماينفع القلب لالاح
لا شك بعض الناس ماهوب صاحي
أبندِبك يابداح مانيب مزّاح
كانك رفيق لي من القلب صاحي
أكود تلقى لي طبيبٍ وجرّاح
يشوف ضيقة خاطري وإنشراحي
أنا هوى قلبي سواليف ومْزاح
مجالسٍ فيها أشقر الْبُن فاحي
شعر: عبدالله بن غصن السبيعي - رحمه الله