طفل مشتاق

الجو برد وداخلي طفل مشتاق
محتاج لك من وحدته تاخذينه
يكتب وحبره دمع وكفوفه اوراق
وفي داخله ثوره وفوضى مدينه
إن لدّ يم الصبح يخنقه الإشراق
وإن لدّ يم الليل غص بحنينه
في مبسمه لشعوب الأوجاع ترياق
وفي محجره موجٍ يبوح بكنينه
يتذكر أمه كلما لاح برّاق
ويشوف فيك الطب لأقسى ونينه
كم كان يتألم لقلبك ليا ضاق
ويصير له مرفى وبحر وسفينه
كم يوم غنى لك مواويل عشَّاق
واليا طربتي قام يصفق يدينه
يروق باله كلما خاطرك راق
واليا سقط دمعك مسحه بيمينه
واليوم شبت في محانيه الأشواق
يحتاج لك من قيضها تاخذينه