بقايا صباح

صباح الخير يا ذكرى تعدت سدرة التعبير
صباح(ن) أرتوت أرضه بدمع الليل واهواله
صباح(ن) جيت احاول به .. لقيته يرفظ التغيير
ولقيت اني على مانا كسير(ن) ضاقت احواله
صباح(ن) جارت اوْراقه علي ابْتهمة التقصير
وانا اللي أنهك اوْراقه كثر ما حطّت ارْحاله
انا اللي واعد الفرحه .. وودّعها بلا تذكير
وضاقت بالندم حاله بهالحاله .. على حاله
وانا اللي قدر اطباع(ن) وفاها مظرب التقدير
وانا اللي حبّ له اسم(ن) وطبع(ن) غاب إجماله
دخلت بمعركة حبّ(ن) وجيشي ينقصه تدبير
وخسرت بأول افراق(ن) نزلت ابحامي انزاله
رحل! .. وابقالي احْروف(ن) منحها نكهة التصوير
رحل صمته وخلاني أبوح ابكل إهماله
بقت لي صحوة احلام(ن) غشاها طاري التأخير
بقا في داخلي طفل(ن) تعلق باقرب احباله
بقت أصعب مراسم ليلتي .. (هالدمْع والتفكير)
بقت لي شوكة اشواق(ن) تكدر بالي وباله
بقالي .. وش بقى أصلا مدام ارضخني التخدير
ومدام بحرفي الساكن تلاشت همزة اوصاله
بقالي هالقصيد اللي بديته من صباح الخير
صباح (ن) جيت احاول به .. لقيت انه على حاله
محمد القعايدة