المواعيد

لي صاحبٍ كل صبح يجدد العيد
من طيش ملحه ليا سكر نباته
لو الصدف غايبه مثل المواعيد
يجيبه الطيف ويسوي سواته
في مشهدٍ كل ما كررته يزيد
قربه من الجفن لين اقلق سباته
العام ذاق القراح من القراهيد
واليوم ضاقت عليه اربع جهاته
ماهي بلحية شجاع وقلب رعديد
خوف انكساره على رجم امنياته
لا ترمي احلام عمرك دايم بعيد
وتعيش مابين .. صدة وإلتفاته
لو يعذر الموت هقوات البواريد
عذر الجمل ما جرح نابه .. لهاته
أكرمت وجه الزمان من المناقيد
وداريت جرحي عن عيون الشماته
لو أن حزني رياح وصدري البيد
الشعر يجمع من شعوري شتاته
يسيّل الضحك في بحر التناهيد
ولو الفرح «غيم» .. ما بلل شفاته