انا وقلبي بيننا وقفت حجاج

ما كل ما نكتب من الشعر نلقيه
اغلى القصيد يموت في وسط الادراج
الشعر لا ما صار واقع نعانيه
يصير للي يسمعه مصدر ازعاج
شعرن يخلد فالعرب طيب راعيه
وشعرن يجيب لصاحبه هم واحراج
اصدق قصيد اللي يجي دون داعيه
فجأه يجيك بلا بروفه ولا اخراج
وقلبي اللي كل ريحن توديه
مثل السفينه بين غبات الامواج
البارحه والليل كله مشاريه
انا وقلبي بيننا وقفت حجاج
على وليف كل ما حل طاريه
يفز قلبي لا ذكرته ويحتاج
اني على بعض الطواريق اجاريه
وانا حتسب حساب شامت وهراج
ناس تجيب الهرج ناس توديه
طموحها التزييف فكره ومنتاج
والا انا في ذمتي اني اغليه
هو عارف انه ساكن بقلب فراج
فراج بن سحمان المطيري