قابل أعذارك

حبيبي.. قابل عذرك وكلك فالنظر مملوح
قبل ما تنطق الكلمة قناعاتي تسابقها
حبيبي.. لا تنهد تستشم من الجروح اجروح
جروحٍ رافقتني منك واجروحٍ مرافقها
حبيبي..لازم انواجه حقيقة ما كُتب فاللوح
ونومن بالقدر وان البشر في حكم خالقها
حبيبي.. لو ذبحك الظلم أنا مثلك بعد مذبوح
قسا البواب والأبواب تدمي كف طارقها
حبيبي.. والجميلة في عيون الكاشح المفضوح
تموت وذنبها سود العيون وطول عاتقها
حبيبي.. عارف جرحك عميق وجاوز المسموح
لمحته فالعيون اللي حزين الدمع مغرقها
حبيبي.. منك أحسه بانكسارة صوتك المبحوح
وفي جبر الخواطر يوم كلماتي توافقها
حبيبي.. وانت من لطفك يغني لك حمام الدوح
ومن طهرك تسامرك السحابه مثل بارقها
حبيبي.. تحسب الدنيا كذا دايم لعب وامزوح
وجنات تذكرنا طفولتنا حدايقها
حبيبي.. مشهد الطوفان وابحارة سفينة نوح
نقيض الموجه اللي بالهدوء تحضن زوارقها
حبيبي.. وانت لي مثل الهواء مثل النفس فالروح
تفارق روحي الدنيا لو أنفاسي تفارقها
حبيبي.. صورتك عندي يجملها العتب والبوح
تخيلها العيون الحالمة والقلب عاشقها
حبيبي.. والعواذل ما لهم من حسدنا مصلوح
تقل لحظة هنانا من عمر ذولاك سارقها