هذا الضيف الأغبر زارني! والضيف له حقّه وله تقدير.. وأنا على ما شفتني يا طير.. مثلك أفزّ من الصدى.. أحتاج مثلك للمدى.. للبوح.. للتعبير خذني أبي أتنفّس خذني مادام إن المساء عسعس! والدار صارت غير!! يا طير يا رفراف.. خذني ورا الأطراف.. خذني، وأنا المسؤول عنّي.. ولا تخاف! الحزن من ربعي!! وعشقي من عرفته ما تغيّر.. في الصبايا.. وللرغيف لحاف.. يا طير يا رفراف.. خذني ورا الأطراف!! خذني وب أحكي بصمت.. للشيح.. للقيصوم.. للعزّاف عن قصة غياب المطر.. وعن طعم هالدنيا بدون إنصاف..!! الشيب من جيت أنزعه.. قالوا مردّك للبياض.. وكل شعره بأربعه..! قلت أربعه! قالوا كثر جهلك ولا لك اعتراض.. والحقيقة موجهة.. آه يا هي موجعة!! إنّك تخون الشمس.. والبرد يسريبك!! آه يا هي موجعه!! إنّك تشوف مرايتك تفرح بتعذيبك.. ي أنت يا طيبك.. أشغلت نفسك في سراب من البشر.. غابوا ودوّرت العذر لغيابهم..!! وفي غيبتك ما دوّروا إلاَّ عذاريبك.. تعوّذ من إبليس ومن هالناس ومن طيبك.. ي إنت يا طيبك! لو لاح لك وجهٍ من الماضي تشجَّع وأصفعه.. أو أمنعه.. ما ينفعك مثلك غبي.. ولا تنفعه..! الشيب لو زارك، وقارك فيه.. حييِّه.. ثم حييِّه.. ثم حييِّه.. الشيب مثل أحلى القصايد.. روعته في مطلعه!! طفله وطاحت من زحام.. قالت: سلام! قلت: السلام نام.. وخليني أنام! من بعد نوّار العمر وش فايدة كثر الكلام!! قالت سواليفك عسل.. زدني غزل.. زدني غزل.. ومن يطلب الجنة من امثالك وصل! يا شاعري قم واسقني نخب الغرام والشيبتين آخر مشاوير الصبا.. وأول مشاوير الصيام..!! ولا على شايب ملام!! قالت: سلام.. قلت: السلام.. ويالله على حسن الختام.
