الصيف

لا سافروا يقضون بالخارج الصيف
شدّيت عزمي للمصايف هنيا
اللي بها نفحٍ من الطيب والكيف
واحلا هواها من هوا (ماربيا)
بين الرياض وبين نجران وطريف
والخرج والباحه مصيفي مهيا
ولي بالقصيم وبارض حايل عن جنيف
عزٍ يعديني حدود الثريا
وبالساحل الشرقي قلوبٍ مواليف
تقول للزاير على الصدق حيا
وبالساحل الغربي عيونٍ ملاهيف
بالضحكه العذرا تموق وتزيا
وفي شرفة الطايف لمن جالها ضيف
غيمٍ يقول لشرفة الحب هيا
ولي في عسير اللي على عمري تضيف
عمرٍ جديد وتشبع الروح ضيا
بالمملكة كنّي بروس المشاريف
ومنين ما وجهت وجهي محيا
أحبها من قلب ماهي سواليف
وبطيبها روحي من الحب ريا
حبي (طبع) وبعيني جبالها ريف
وبحبها نفسي تسامت عليا
وفي كل يوم أزيد رفعه وتشريف
وتزهر بقلبي مورقات الحميا
عن غيرها مقفي.. ومشغول.. ومعيف
واحبها لو غادي الرأي عيا
محتار من بين الضلوع المهاريف؟؟
القلب.. والاهي.. بروحي تفيا
أحبها واقضّي البرد والصيف
من فضل ربي طول عمري هنيا
الشاعر/ علي المفضي