قال الطبيب

واللي هوى عذره معه لو حس ليله طويل
يا من لقلب شاف من دنياه شيء يهول
شال الهموم وشيلها لا شك حمل ثقيل
من سبة اللي حبهم داخل ضميري يجول
ولا لهم بالناس في روض الحشا من عديل
ولعتني واسهرت عيني يا لغزال الجفول
بين الرعابيب السمر والبيض مالك مثيل
حتى القمر من حسنك الفتان حسنه يزول
مسكين قلبي يوم شفتك ضاع منه الدليل
قال الطبيب اسمع كلامي قلت مهما تقول
بعد الله المعبود ما غيره طبيب العليل
حسبي على ناس تبي بيني وبينه تحول
ناس تروح اعمارها ما بين قال وقيل
لا تسمع الواشي ولا تسمع كلام العذول
كم عاشق خلو دموعه فوق خده تسيل
لا تعذلوني بالهوى واللي عذلني جهول
لو كان قلبي في يدي ما طعت قلبي يميل
منصور عبدالله المجيدل