المشاريه

ياصاحبي كثرت عليك المشاريه
بس أنت ماهمك كثير الشكاوي
سوادك اللي داخل القلب مخفيه
ما احتال في طيبي وبيض الهقاوي
بنيت لك قصر (ن) وياصبر بانيه
وأنته لهدم القصر ياخوك ناوي
ما جاك مني غير تامر ولبيه
ولا جاني منك إلا الحسد والبلاوي
ضيقت صدري يارفيقي علي ليه؟
وأركيت من بين الضلوع المكاوي
مغرور عايش عيشة الباشه البيه
تفرد جناح الكبر وأنا سحاوي
أدرى على رفقتك من غابر وجيه
وجيه تفرح بالفتن والدعاوي
أحذر ولا تغتر بالوقت ياهيه
فيرجعك ظميان لو كنت راوي
والرفقة اللي مابها لذة وتيه
ياجعلها ذيب (ن) من الجوع عاوي
هذا وأنا بين أبغى هذا وما أبغيه
أحث خطوات القدم للعلاوي
أسير في طاعة إلهي ولا أعصيه
فقير وإليا طعت ربي غناوي
وأحسب حساب العمر بريال وجنيه
فليا دغفني وش تفيد العزاوي!
وأرقى بضلع (ن) شايبي دوم يوصيه
للمرجلة والطيب حث الخطاوي
وضلع المراجل عاليات (ن) مراقيه
ونيل المطالب مايجي بالمناوي
وحكي الردي في ذمتي ماعلي فيه
أحمق يحسب حسنتي له مساوي
بأصيغ له بيت (ن) من الشعر قاريه
بيت (ن) من الحكمة لقلبي شفاوي
لكل سقم علاج ودوا يداويه
إلا الحماقة مالها من مداوي
عبد الله الشهراني