الصمت المغرد

لله ياصمت غرد عن كثير الكلام
وارقا السما وأكتب بصدر السحايب أدب
لو ينكتب هالشعور أللي بسرب الحمام
ماكان مثلك عن أسراب الحمام انكتب
لله ياللي ترك لعبة شعوري حطام
وللحين طفلة خيالي ماكفاها شغب
أحيوا: ظنون الصدور، ومات: طهر الغرام
وسقيت نخل السكوت ولانبت به رطب
لو كل حلم يتحقق لانخيت المنا
ماكان حال الحقيقة في عيوني صعب
شفهم ملوا كل ماحولي بكثر الزحام
وشفني بصمتي مليت إحساسهم بالعتب
وش صار لو زادوا بعين الضرير الظلام؟!
وش صار لو نادوا الضيقه لصدر رحب؟!
والبارحة طار من غصن السوالف ملام
والبوح : نار من صدور الأوادم تهب
وأنا أكبر أحلام عمري.. هالمواجع تنام
وأنا أصغر أللي سكن صدري نوايا محب
شح الفرح وابتديتك والمشاعر صيام
والوقت: ليل ملا وجه المسافر تعب
ياصمت.. وش عاد لو سمو (حياك)... انهزام
وأنت الجبل لاغدت ريح الحكاوي مهب
يكفي حضورك يشابه بالجفاف الغمام
ويكفيك بعيون فضة هالسوالف ذهب
كن أجمل العمر (صوت) وهالليالي ركام
ولا.. حسوا العابرين بصوت تحت النشب
لله توي عرفت شلون.. معنى الهدام
وأنا أكثر أللي بنا سطح الأماني (سبب)
قل للأمل من عقب سهر المواجع ينام
أبطى صباح الحياة وكل حلم انشطب!
لو قصدهم باني النور.. لضرير الظلام
ماكان خلوني لنار السوالف... حطب!!.
ناصر الوبير