الرجال المناعير

البارحة ودلال حزني مباهير
هلت دموع العين غصب عليه
عليك يا ستر البني الغنادير
وعليك يا راع الكفوف النديه
يابو يدين ما تهاب المخاسير
يم العطا تسبق هذيه هذيه
ويابو يدين للمواقف بواتير
يشهد لهن حلو الزمان ورديه
سجل له التاريخ ظمن المشاهير
مجد مسطر بالكرم والحميه
في ملتقى الهيلا تميز عن الغير
ضيف عتيبه ضيفت حاتميه
فيه الوصوف تحير والدمعه تحير
من محجر عيوني لراحة يديه
مرحوم يا زبن الرجال المناعير
لاجا نهار فيه روحه.. وجيه
لومت يا عبدالعزيز المسافير
سيرتك فقلوب الرياجيل حيه
قصيدة رثاء في المرحوم بإذن الله الشيخ عبدالعزيز بن خالد بن جامع أمير الفوج الخامس بالحرس الوطني.
نسأل الله العلي القدير ان يتغمده برحمته وجميع أموات المسلمين.