سعد عبدالرحمن

تبغى تباريني

كن الظروف اليوم قدامي فريق
تبغى تباريني على كأس القهر
جرح ومشاعر حزن ومخاواة ضيق
وخوف ومعاناة وتفاكير وسهر
إليا بغيت الصدق ما أحصل صديق
وإليا ظميت العشق ما أحصل نهر
وإليا نويت أروح ما أحصل طريق
وإليا وقفت أحيان ما أحصل ظهر
وإليا نويت أسبح شعرت إني غريق
ويمرني يومي وأحس إنه دهر
ومن كثر ما في خافقي الطيب حريق
شكيت بإن اليوم ساعاته ظهر
أغفى وحزني داخل ضلوعي وأفيق
مبطي وهذا الحال ما هو من شهر
علاقتي والحزن رابطها وثيق
دفعت فيها من عنا قلبي مهر
ولو الظروف اليوم ما سوت فريق
أهديتها كأس المواجع والقهر