الشاعر : محمد السليس : هذه حقيقة غيابي عن أمسيات عفيف

أعزائي أعضاء وزوار موقع إخبارية عفيف نستضيف اليوم شاعر من شعراء محافظة عفيف أحد شبابها الذي ظلمه الاعلام في ابراز شعره الذي يروق لذائقة المتابع شاعر امتدحه عدد من الامراء شاعر مبدع ومتألق في أمسيات خارج محافظة عفيف فدعونا نتعرف على شاعرنا من خلال هذا اللقاء :
البطاقة الشخصية للشاعر محمد السليس ؟
الإسم : محمد علي السليس
العمل : أعمال حره
الحالة الإجتماعية : متزوج
متى بدأت تكتب الشعر ؟
قبل حوالي 15 عاماً وكانت بداياتي محاولات خجوله حتى وصلت الى مستوى أشاد به كبار الشعراء
هل هذا أول لقاء لك بالشبكة العنكبوتيه ؟
لا هناك عدة لقاءات بمواقع قطرية وسعودية .
هل أجري معك لقاء في أحدى المجلات الشعبية سابقاً ؟؟
لا وانا السبب في ذلك لعدم رغبتي في الظهور اعلامياً في ذلك الوقت
أيهما أقرب إليك شعر المحاورة أم شعر النظم ؟
شعر النظم في فترات معينه وشعر المحاورة في أغلب أوقاتي
هل تذكر أول قصيدة كتبتها ؟
لا أريد الخوض في البدايات لانها كانت ذات مستويات متواضعه ولا ترقى للقراء
لماذا لم نشاهد الشاعر محمد في القنوات الفضائية رغم كثرها ؟
تقصير مني إتجاه الإعلام وهذا الوقت الشاعر هو الذي يبحث عن الاعلام وانا لا ارغب البحث عنه وانما شعري هو الذي يبرزني .
هل تقصد ان اغلب الشعراء يبحثون خلف الاعلام من اجل ابراز انفسهم ؟
بلا شك هذه الحقيقة ويا كثرهم ولكن لا تجد لديهم شعر يرتقي لذائقة المتابع
لماذا إقتصر حضورك على المواقع الالكترونية وبالذات مواقع دولة قطر ؟
لوجود شعراء على مستوى عالي في دولة قطر وأحببت أن أكون ذا حضور مميز بينهم وأكتسب من خبراتهم الشعرية .
هل شاركت في أمسيات أو محاورات شعرية ؟
نعم شاركت في العديد من الأمسيات الشعرية كان أغلبها في الرياض والخرج والشرقية وأما بالنسبة للمحاورات فقد إقتصر حضوري في الحفلات الخاصة بزملائي ومجالسنا الخاصة بعيداً عن الصخب الاعلامي .
لماذا لم نشاهد الشاعر محمد في أمسيات ومناسبات محافظة عفيف ؟
عفيف ليست بارة بأبناءها وأنا لم أتلق أي دعوه ولو دعيت لحضرت بدون أي مقابل لما تستحقة عفيف مني .
بماذا لقبك صاحب السمو الأمير فيصل بن يزيد في أحد اللقاءات به ؟
لقب سمو الامير أفتخر به وهو وسام على صدر ولقبني بالضوء القادم من النجوم .. شعاع عفيف وصاحب النكهه الجميلة ..
ومبدع القوالب الشعرية .
هل الساحة الشعرية أكتفت بعدد الشعراء الموجودين وليس بإمكان أي شاعر جديد إثبات نفسه في هذا الكم الهائل من الشعراء ؟
الشعر موهبة لا تتوقف على أحد ولكن يبقى للشعر متذوقيه وعمالقته والساحة لا تنظر لعدد الشعراء وانما تنظر لما يكتبه الشعراء .
ماذا يعني لك لقب صاحب السمو الامير : عبدالرحمن بن سعد بن فيصل عندما لقبك شاعر جيل الشباب بمواصفات قديمه ؟
كلام سيدي سمو الامير يعتبر وسام على صدري ودافع لي لتقديم الجديد والمميز وهو احد متذوقي الشعر المبدعين .
هل عفيف تملك عدد من الشعراء المبدعين ؟
الكثير والكثير ولكن شعراء عفيف ظلموا انفسهم بإعتمادهم على الاقليميه في شعرهم .
متى أحسست بالقدره على الوقوف أمام الجماهير وإقامة الامسيات الشعرية ؟
عندما شجعني الامير صاحب السمو الامير يزيد بن فيصل وقدمني في أحد الامسيات في مدينة الرياض بحضور عدد من الامراء والشعراء .
أيهما تفضل الشعر الفصيح أو الشعر النبطي ؟
الفصيح كان في مرحلة دراستي جامعة الملك عبدالعزيز بجده ولكن النبطي هو الاقرب لقلبي دائماً .
لقبك العديد من الأمراء بألقاب عديده خلال لقاؤهم في جلسة صاحب السمو الامير يزيد بن فيصل ؟
جميع من شجعني من أصحاب السمو الامراء والشعراء هو فخر لي وتشجيع لي لتقديم الجديد والمميز ولكن كلام صاحب السمو الامير يزيد بن فيصل بن يزيد عندما قال : السليس أقل ما يقال عنه إنه شاعر فيلسوف في مفرداته مزاجي في تعامله مع النظم ..فلا يمكن ان تتنبأ بما سيصدر عنه .. فهو يداهم دهشتنا ويبعثر مُخيلتنا بكل ماهو غير متوقع ..سريع البديهه حاضر الشعر وصاحب حضور جميل ..يحمل الطيبة وروح الحياء البدوي الأصيل في شعره وفي منطوقه .
. ويحمل الصخب والفوضاء في احيانا اخرى عندما ينفعل على قافيته ويحاول ان يروضها لكي تخرج ابياته في نسق منظوم مُتقن الترويض .. فهو يرى القصيدة الجديدة ك المهرة الصغيرة المتمردة ويجب ان يعسفها خبير مُتمرس .. فلا ضير أن يقضي وقته في ترويضها ان احتدم مزاجه وإن ((إسفهل )) فهو خير من يدلل قصيدته .. وإن إحتدم شعراً فهو بركان يقبل ..جميع الضروف الصعبة .. حتى يروضها
وكلام صاحب السمو الملكي عبدالعزيز بن مشهور بن مساعد بقوله محمد السليس خلط انسجة خاصة به وانماط لا يمكن ان تكون لغيره فهو تمكن من ادواته وأبحر على فلسفتة ..
وطرق باب الشعر بطرق مميز فهو شاعر رسام بالحروف مُبدع وكأنه ينحت قصائده على شكل عمل فني ويمزج أعماله الشعرية بروحه وبيئته .. محمد السليس أخذ من همومه حروفاً ومن احزانه عناقيداً ومن تجربته إطاراً وخلفية لإعماله وكيف ما اراد ان يُشكل في أعماله ف للعمل بصمتهُ الخاصة به ..فقد جعل من الكريستال سائلاً ومن الماء صخراً ومن الهم كائناً ومن النجوم اصدقاء له يتحدثون معه احياناً ويستمعون له احياناً اخرى
..فهو يختار خلفيته لوحته وكيفيه الوانه وهو يعلم أن الجماليات متواجده في كل الأشياء من حوله ولكنها تتفاوت وبنسب معينه .. كما تتفاوت النجوم بقربها وبعدها عنا ..
وكلام صاحب السمو الامير عبدالله بن فيصل يزيد بقوله المتابع لقصائد السليس يجدها نوع من الإبحار والبحث عن جماليات الطبيعة وجماليات كل من يسير بقدميه على هذه الطبيعة ..
فهو شاعر فنان وبيده قلم متمكن وريشة تجيد اللعب بلألوان ويد تجيد النحت وتشكيل الأشياء ..السليس داخله بركان ثائر يسكن في صدره .. وفنان جميل وهاديء يسكن قلبه .. ويملك نظرة عجيبة لروئية الأشياء من زوايا مختلفة .
متابعينا نستأذنكم قليلا لننتقل الى اجمل ما كتبه الشاعر محمد السليس في الشعر النبطي والفصيح والمحاوره التي أختارها لنا :
في مجال الفصيح
مازلت ابحث في نفسي وازمانى=ارضا من العشق تمحو كل احزانى
فالصبح يخذلنى والليل يغرينى=والحلم يسكن في قلبي ووجدانى
والصبر يقتلنى والشوق يحيينى=ولا ازال غريبا ً وسط اوطانى
لازلت ابحث عن حب ٍ يشكلنى=ويرسم الحب في نزفي والحانى
حتى الحروف اللتى كانت تنادمنى=قتلت حضوري في سماء زمانى
حتى الاماكن ماعادت تكلمنى=ولاتشكل حرفي عبر اشجانى
كل اللذين عشقتهم فيما مضي=لم يفهموا شرعي ونص بياني
==============
غيري كما يحلو لكى وتأكدى=انى احب الغيرة العميائي
ياحلوتى وحبيبتى واميرتى=ومدينتى وقضيتى ونسائي
ثقي بأنى لن افرط لحظة ً=بهواك او برياضك الغنائي
قد كنت قبلك ثائرا ً متشرداً=من عالم الاعراب والبسطائي
رجل بسيط واضح ٍ مغمور=لم اهوى يوما ً عالم الاضوائي
قومى لهم فصل الخطاب سجية ً=من خير من وطئوا على البيدائي
معهم ولكنى غريب ٍ بينهم=من لامحب له كما الغربائي
حوربت في زمن ٍ يقل وفاءه=حتى بلادى اهلها اعدائي
كل القضية ان صدقي مصيبتى=ولااجامل اغلب الشعرائي
لم استسغ فن النفاق واهله=في مجلس الادباء والامرائي
=================
خمرى هو الشعر .. والافكار معصرتى=أقلامي الكأس .. والاقداح محبرتى
هيا تعالى الى خمرى .. نعاقره=فالسكر من غيركى .. تأباه اوردتى
سيجارتى ..تبغها ماعاد يغرينى=ولا تسلل من عامين .. في رئتى
ياربة الحسن مافي الحى من احد ٍٍ=يصحوا على صوت اقداحى وعربدتى
ان الاحبة.. ياليلاي .قد ثملوا=تسامروا ..دونما نبس َ من الشفتى
=======
لو تجرحيني ما بكيت=ولا سئمت ولا أشتكيت
هيا افعلي ما تشتهى=فالأمر لي وأنا رضيت
أن تظلمي أو تعدلي=فأنا أثينا افروديت
أنا أرضها وبلادها=وأنا فداها ما حييت
=============
في مجال المحاوره
بين النجمين (( محمد السليس @@ ابراهيم الشيخي ))
محمد السليس = ...
الا يالنداويه عليكم سلامى=نردة لنجمٍ من النجوم المطله
الا ياولد زهران شد الحزامى=وهاك الثمين ومارخص منه خله
ابراهيم الشيخي=..
هلا مرحبا عداد ورد الحيامي=من الهاجس اللي ماتجي منه زله
ولا يامحمد جيت واللعب حامي=ولن جبت غالي العلم يفداك كله
محمد السليس = ...
يدوم البقا والعلم ماهوب طامى=متى الله يبدل بالاهلًله اهلًه
ترى الجرح مابين اللحم والعظامى=بسيطٍ دواه وليت احد فاطنله
ابراهيم الشيخي=..
اثاريك طامع في كبار الاسامي=تبي تقلع احدهم وتقعد محله
ترى كل شيٍ عندنا له نظامي=ولاكل من فيديه سيفٍ يسله
محمد السليس = ...
اببدا براس شعيل نابى السنامى=على راسه امسي مزنةٍ مستهله
واصدر على ابراهيم مرسوم سامى=وكم من خليلٍ بفرقه دون خله
ابراهيم الشيخي=..
ولا يامحمد مانت جايع وضامي=على شان تقعد للمناعير عله
ولن كنت تونس لك بخشمك عرامي=ترى قدمك اللي كل عقدٍ يحله
محمد السليس = ...
ملا عين ابن زهران صحن الايدامى=وربعه شبابه تعتبرها مذله
واذا قلت ابا افزع مع (خناذف ) عمامى=مصير (السحيمي ) يوم تمسي عشاً له
ابراهيم الشيخي=..
انا ماجتنب فرضي ولاجرح صيامي=وحب المراجل في ضميري جبله
ولا ياجملنا ياكبير العظامي=لاتهزا بغصنٍ مبركك تحت ظله
محمد السليس = ...
وفالختم احب اقول بعض الكلامى=ترى بان لك مله ويخفاك مله
لعلمك لعلمك كان مغزاى سامى=مع الوقت تفهم ويش انا عانىٍ له
ابراهيم الشيخي=..
صلاتي على المختار مسك الختامي=ولابعد هذا العلم ليته لعله
تفقد كلامي لين تفهم مرامي=وبكره يبان العلم دقه وجله
========================
وفي مجال النبط
مقتطفات من اشعاره
========
الشعر عبدي ..وانا واحد من اسياده=غصب ٍ على خاطر الزعلان والراضي
لاهس دربه ..فأنا سوطه وجلاده=وان دل دربه ..غفرت الذنب والماضي
جانى هديه ..مع اللوعات بقياده=ماجا من الواقع المليان والفاضي
تعبت لين ادرجونى ضمن رواده=رفعت دعواى ..وأثبت حقي القاضي
========
منول احلام عمرى كانت وكانت=وخسرتها كلها واحد ورى الثاني
==========
قالت بصوت ٍ فيه غي وترانيم=لاعاش حي ٍ حال بينك وبيني
انت الاسد وانا تحت كفك الريم=كلنى أذا ياصاحبي تشتهيني
===========
صداقتك تعتبر .. اجمل صداقاتي=اعتز فيها ..واحييها ..واقدرها
تعيش في داخلي ..وتلملم اشتاتي=ولا افكر ف يوم ..ب كسر خاطرها
احس فيها ..تشكل من معاناتي=من اول اشواقها ..لاآخر مشاعرها
==========
اذا.. اعجبك شطر بيتٍ نازفه حبري=فأنا اعتبره الوسام ...لمجمل اشعاري
=========
عطينى الناي الحزين وغنى=الليل ساري والهوى سمارى
ورديلي ..اجمل ماخذيتى منى=النوم.. والراحه.. وعذب اشعارى
=========
طيفك لفا البارح ولا رد السلام=وانا احسبنه من غلاى يظمنى
تبي الكلام اللى ولا بعده كلام=ياللى تبعثرني غلا وتلمنى
انا آخر العشاق في دنيا الغرام=اقولها واللى زعل ماهمنى
===============
البارحه هبت على راسي نسانيس البراد=واشعلت هاجوس القصيد وطاب موال السهر
وقربت لى دله واناجالس على حيد الشداد=وارخيت لعنان الهجوس ودار دالوب الفكر
من امس وانا في صباح وفي هجاد وفي عناد=اخذ حجر وارمى حجر واعدل حجر واقلب حجر
ماكنى الا فارس ٍ يوم المعارك و الطراد=يرقب متى رد البرى وايقن بعد جاه الخبر
تعبت واتعبت المطايا من بلاد الى بلاد=احيان ترعي في قفر واحيان ترعي في زهر
أدور ذهيب ٍ غدا وامسيت مثل السندباد=مامل من طول الرحيل ولاشكا طول السفر
مليت من جور الزمان وضقت من ظلم العباد=الوقت يطعن فالنحر والناس تطعن فالظهر
الي متى في عين حسادي وانا اذر الرماد=والى متى وانا ادمح الزلات وارمي فالبحر
============
انتى مدينه عامره بالاحاسيس=لك زخم باريس وحضارة اثينا
من حولك اسوار وجنود ومتاريس=حتى على ساحلك مافيه مينا
ابعد من الجنه على حضرة ابليس=واقرب من الدمعه بعين الحزينا
=========
صوتك الى منك صحيتي من النوم موشح اندلسي .. تغنيه فيروز
===============
حنا العرب ..صرنا مطيه ماتهاب من الركوب=يركب عليها الغرب لين يحقق اللى يدركه
ضاعت مبادئنا وضاع الدين واخطينا الدروب=وصرنا نقلد غيرنا لو طاح في وسط شركه
وحكام بعض اقطارنا صاروا مثال للعيوب=خير البلد تستهلكه ...وشعوبها مستهلكه
وابسط عذر تستخدمه في مسألة قمع الشعوب=لاصوت يعلو في وطنا فوق صوت المعركه
==========
ياكثر ماراسي توسد كوعى=والناس في حلو المنام هجوعي
مالى ونيس الا القلم والدفتر=اغلى مواليفي واعز ربوعي
ياليتنى ورع ٍ صغير وجاهل=اطفي شموعى واشب شموعي
ماعندي الا لعبتى وثيابي=وما افكر الا فالظما والجوعى
ماشلت هم ٍكبر ضلع العارض=بين الحنايا والنحر وضلوعى
جاثم على قلبي ولايرحمنى=صوت الضمير اللى يشق سموعى
اسباب تقصيري وكثر ذنوبي=يوم اتذكرها تطيّر شوعى
يارب انا عبدك ومالى غيرك=ومن خشيتك دايم تفيض دموعى
===========
الحزن مع حضرتى دايم كريم=مايمن ولايطوّل بالغياب
كنى الدمعه على خد اليتيم=وكنى اللاهث ورى طرد السراب
اتظاهر بالفرح.. وانا غشيم=كيف يفرح واحد ٍ كله صواب؟؟
==========
اذا نويت تغيب يامنبع التوت=عطنى خبر من شان اظبط امورى
لكن امانه لايقاطعنى الصوت=صوتك ووصلك عندى امر ٍ ضروري
وصلك يكفيني عن الشرب والقوت=وصوتك سماعه من دواعى سرورى
حقك علىّ ..انى احبك الى الموت=وحقي عليك ..انك تراعي شعورى
==========
كنت افكر فيك دوم وكنت ابيك=راضي قيودك ..مبي تحريرها
وكانت اشواقي وروحي في يديك=بس ما وفقت في تقديرها
اعتبرني فرصة ٍ راحت عليك=واطلب الله العوض في غيرها
=========
ياخذني الشوق لين آقف على بابك=وتهل عيني على اطلال الغلا الماضي
يوم اسرق الضحك من تينك وعنابك=وأجيك زعلان وارجع داله راضي
كان اجمل الشعر يوم يلملم اسرابك=تكون به متهم ..وتمثل القاضي
===========
لاتسأليني ؟؟؟ ليش أهل العباير=كيفي .. وانا ابخص ..في عبااير عيوني
=============
تبقين غير الكون فالحسن يابيروت=جميله وانيقه في مساك وصباحاتك
يجيك الحزين الهايم المغرم المكبوت=وينسي همومه والتعب بين ساحاتك
=============
عاتبنى بذوق.. واجرحنى بحنيّه=عشان اقدر حضوره واكره غيابك
ترى المحبه حلاوتها الحقيقيه=انك تضحى بكل الكون لا احبابك
============
تبسم لجارحك .. واضحك لمبغضك=تكسر مجاديف الثنين .. بسهوله
===============
البارح علومك ومحور حديثك=عن السفر واجواءه العالميه
بغيت اقول ارجوك عجل بغيثك=ترى جروح الوصل خضر ونديه
لكن ماراح اطلب ولاشي .. حيثك=تدرى وش ابغي.. مايبيلك وصيه
===============
ياعازف العود لاتقسي على اوتاره=ارفق بحال الجريح وقدر شعوره
بعض اللحون الحزينه تكشف اسراره=خصوص ..لاكان جرح وغاب دكتوره
الشوق .. نوتة عنا ... والفقد قيثاره=الحانها من سنين العمر مبتوره
وجيش المشاعر متى ماشن له غاره=ذكّر وصال الحبيب وماضى عصوره
وانا صراحه... غريب يعيش فدياره=مؤمن بمبدأ .. وخايف يعلن الثوره
===============
في غيابك كن لون الكون داكن=والفرح مثل اليتيم ... بلا قرايب
الشوارع مظلمه والجو ساكن=والمدينه موحشه والشوق ذايب
آه لوتدرى عن احزان الاماكن=كان ..ماتميت ساعه ..وانت غايب
=================
فتنة الحفل غارت من بهاك الزهور=كل زهره جميله من حلاك ..ذبلت
يوم جيتى وعم الصمت كل الحضور=كل غيره بقلب الحاضرين .. شعلت
في تواضع حضورك مات كل الغرور=والستاير على كل البنات ..نزلت
============
تعال قبل اصير شاعر ومشهور=وتعض من فرقاي كف الندامه
انا طلبتك ود واحساس وشعور=دام الغصن شامخ ولابه ..حمامه
ولايغرك كونى انسان مغمور=انا حضورى ..بدر ليلة تمامه
==============
ودي بعد طوّل غيابك .. بلقياك=ودي اناظر ..مابقي من حنيني
بشوف وش سوى زمانك ..بدنياك=حتى الاقي عذر .. لدموع عيني
ياكثر مامرت على البال ذكراك=واحيت حكاية مامضي .. من سنيني
يوم اقطف الامال ..في الحلم .. وياك=واقول يابدر البدور ..احضنيني
اهيم واسمع نبرة الحزن ..وبكاك=وارجع وانا كلي سعاده .. حزيني
ياما زعلت وقلت انا الشعر .. لرضاك=وياما غفيت من الوله ..في يديني
=================
يامساومنى على ..جرح الكرامه=اخسر احلامي .. ولايرخص مقامي
علم العذال.. يامال السلامه=تبرد جروحي ..ولاتبرد عظامي
لو يعيب الذيب ..جرحه وانهزامه=ماعوى فوق الجبل ..والجرح دامي
الحظيظ ..اللى على كيفه منامه=مستريح من الموده.. والغرامي
==================
صفحة ٍ جت في حياتى وانطوت=وعادتى لاقفيت ماناظر ورى
نجمة ٍ من عالى ابراجى هوت=لو خفوقي من هواها مابرى
ولو عيونى من حلاها مارتوت=أنى ارجع في هواها ماطرى
مأكذب اليا قلت للزين احتوت=وللحنان اللى ندر بين الورى
بس طاعت كبرياها وانغوت=وفي الهوى ماحب بيع ومشترى
=================
احن لايام ..الشقا .. والطفوله=واذكر برائتها .. وتذرف دموعي
يوم الحياه اعيشها .. بالسهوله=واكبر همومى عطلة آخر اسبوعي
يمر يومى .. والدقايق عجوله=من فرحتى فاليوم..ما اظما واجوعى
واليوم يومى في حسابي يطوله=من موعد القومه ..لموعد هجوعي
=================
البارحه دمعة عيونى خالطت حبر النشيد=يوم السفر كان القلم والدفتر أيام الغياب
اليوم ثانى يوم وانتى يامنى عيني بعيد=فقدت صوتك والبستنى ضيقتى لبس الثياب
اليوم في بعدك دهر هاذا هو الشئ الاكيد=لاعاده الله من((غياب)) اللى له اسرجت الركاب
============
تدرى وش الحكمه اللى دوم في بالي؟؟=( حاول تبيّن شموخك ..في انكساراتك)
==================
من ثلاث سنين عطرك مابرد=ريحته باقي اثرها في يدي
مثل زولك عن خيالى ماشرد=من بعد ليل الوداع السرمدي
يوه .. لو تدرى ..بذكرك ..لاورد=كان ترحم حالتى .. ياسيدي
==================
يادمعتى وقفي لحظات في موقي=وان رحت في عزلتى هلى على كيفك
هلى على ضيقتى والا على شوقي=والا على حظك .. وفرقا مواليفك
هلى .. عشان اتسلا والعب طروقي=مادمت انا الضيف ..هاتى واكرمى ضيفك
ياصاحبي هد طيري واطلق سبوقي=والا تعال انعش القلب بسواليفك
مادام راسي صحيح وتنبض عروقي=بأعيش مع ذكرياتك واحتضن طيفك
اقولها واحتمى قولى وانا ..روقي=اهواك ... لو ان قلبي مات من سيفك
==================
ترى حلاة الجسم ... ايام وترووح=تفنى ..ولايبقي ..سوى طهر الارواح
==============
حبيت حرف النون من شان خلى=وحبيت كل اسمٍ بدا بأوله نون
================
يابنت انا مانى .. بحي الله انسان=يحب في ساعه ويكره بساعه
انا بشر كلى مشاعر ووجدان=ألجم شعورى قبل ماطوى شراعه
اشيل ماشال الجمل فوق الامتان=بس ان قلبي صعب ..تلوى ذراعه
============
قالت .. أحبك .. قلت ابي شاهد اثبات=قالت ... الى هلت دموعي ... بوريك
===========
تلومنى لا قلت ما بيك ما بيك=من بعد مابين الحنايا سكنتك
كنت اشتري ضيق المخاليق وارضيك=وان ضاق صدرى بالمواجع زبنتك
لكن تعلمت الخيانه على ايديك=شفتك .. تخون اشواق قلبي وخنتك
==========
قررت.. اعيش اللى بقالى ..بدونك=ماعاد باقي فالعمر كثر ماراح
مليت من طيشك ..ونزعة غرورك=اهديك حب وتهدى الخافق اجراح
وامر وادهى من جروحك ..ظنونك=تظن في السوء ..وتنام مرتاح
ماهوب انا اللى.. في غيابك يخونك=لوطاح غيري..قلب مغليك ماطاح
ما اكفاك ..لامن شفت دمعة عيونك=سهرت.. اكفه.. لين فلاج الاصباح
واتعب عشان اصنع سعاده..بكونك=وماشوف منك الا ..المواجع والاتراح
أقسي من طعون الليالى ..طعونك=وماعاد باقي فالعمر ...كثر ماراح
===============
ان كان حبك في حياتى خطايا=سمونا يغفر خطانا ويمحيه
انتى من الاقدار احلى الهدايا=واغلي هديه فالزمان ولياليه
اخذتنى من بين ذيك الزوايا=وعيشتنى جو ٍ جميله معانيه
وسمعتنى شهد الحكي بالشفايا=وسلمتك القلب المعنى وراعيه
له بحة ٍ سوت بقلبي سوايا= خلتنى انسي العالم اللى أنا فيه
بس الاكيد انه يجيب المنايا=و يذبح خفوق اللى يحبك ويحيه
لا يابعد كل البنات الصبايا=اموت لاناديتك .. وقلت لبيه
=======================
ان بغيت تزيدنى هم وعنا=دور جروح ٍ على قدري تليق
وحط جرحك ياهنا ..والا هنا=خافقي شامخ مثل قمة طويق
والعياذ من الأنا.. لكن انا=كم جرحنى من حبيب ..ومن صديق
واقلب جروحى مواويل وغنا=واقهر العذال ..واسر الرفيق
==================
الشيب لاح بمفرقي في شبابي=حزنى شباب وفرحتى عمرها شيب
============
كلم وسولف يابخت اللى تسولف له
اكيد مرتاح لعلومك على الآخر
اكيد تسرق جوارح قلبه بغفله
بأسلوبك الرائع الفتان والساخر
سوالفك ..محتواها ..يشبه (الحفله)
لان مجمل كلامك راقي .. وفاخر
======================
جودي بوصلك..مابقي للصبر حيل
ملت من الصبر الطويل المحانى
يالله تعالى ..تنتظرك التعاليل
شابت دقايق ساعتى والثواني
ابي الجمال..اللى قليل ٍ بها الجيل
يملا عيونى عن جميع الغواني
وابي العيون.. الناعسات المظاليل
ترسم على حد المجره مكاني
وابي الجديل اللى فضح ظلمة الليل
يلغي انطلاقه..ليل سبع وثماني
وابي القوام يعزف عذب الموايل
ويرقص كذا من دون لحن وأغانى
===================
الغصون اللى تميل مع الهبوب = كل ماهبت رياح تلوفها
ماتميل بقلب رجال محسوب = يظبط الحبكه بسبك حروفها
بادي فالرجم قدام الغروب =في ضلاعين ٍ تهيل قيوفها
ايتغفل شردها والشرد عوب =ماتحق البندقيه ..شوفها
لو نعرف اوصاف سودان القلوب =مابلشنا بالعرب وضعوفها
بين ٍ وجه الصدوق من الكذوب = مير اعدي كذبته واطوفها
شاب راسي من مشي عسر الدروب = والحياه وضيمها وظروفها
اكبر الغلطات واشر العيوب= تجحد الريجيل في معروفها
====================
الفقد .. ليله لونها أسود ..وحالك
من هولها يمكن يشب الوليدي
ظلما ..وخوف..وغب صحرا مهالك
والريح ..وسباع الخلا ماتهيدي
حاولت ادور في غيابك ..بدالك
ومالاق لي غيرك..قريب وبعيدي
تدرى وش اللى في غيابك ..بقالك
عبرة هدب عيني ونزف الوريدي
===================
البارحه ..غار المسا من حضورك
حتى القمر منك انكسف وجهه وغاب
والشمس لو هي فيه ذابت ..بنورك
لوجت مع الطاقه ..تغادر مع الباب
جيتى بحسنك والدلال وشعورك
واحيا السهر روح الغلا والسمر طاب
كان التواضع فيك قمة غرورك
من قدنا ..ليل وطرب روح واحباب
==================
دامك قدرت تغيب عنى ...ولو يوم
أرجوك كمل غيبتك .. طول الايام
احب اعيش العمر هايم ومحروم
ولا اتعلق في رجا بعض الاحلام
================
لاغبت والا تعبت وصابني حاجه
أمانه البندري لحد ٍ يبكيها
تحملوا صوتها المبحوح وازعاجه
واللى يبي فرحتى ورضاي يرضيها
أخاف تحتاج للدكتور وعلاجه
وتطيح عن حيلها محد ٍ يوديها
هى نور عيني ونور القلب وسراجه
الله يتمم لها والله يخليها
=================
الغفال العوب ما اخطاها لساني
يوم قلطت الدلال الشاذليه
اطلق الهاجس ورى شرد المعاني
واسرج الفكره على ظهر العبيه
واللسان حصان ولساني حصانى
والفجوج وساع والنيه مطيه
قمت اراجع خط سيري في زماني
واحسب اللى فاتني قبل البقيه
في سراب اللال علقت الامانى
لين مت من الظما في المهمهيه
=================
كل الدروب اللى تودي .. لروما
عيت توديلك ...وعيت تجيبك
===============
من يوم قفلت الحقايب وسافرت
والضيق يرسل للمحاني فلوله
حتى الرياض بناظرى مالها كرت
صارت شوارعها الرحيبه ملوله
خليتنى مع ذكرياتك وغادرت
أسامر غيابك بعرضه وطوله
ماتدري بحالي ألي من تذكرت
والليل موحش والدقايق خجوله
اشتقت؟واعلنت الفراق وتحيرت
مقدر اضحي بالغرام بسهوله
==================
عقرب الساعه قتل صمت الثواني
والغياب المنتظر قرَب حضوره
قبل تتركنى على هامش زماني
اسمح لقلبي ..يعبر عن شعوره
كنت شي ..وصرت فجأه شي ثاني
دار دولاب الزمن فيك ..الف دوره
في حضورك كان للضحكه معاني
تخفي طيوف التعب لحظة ظهوره
يوم اجيلك في مكانك من مكاني
اسبق اشراق الضحي لاشع نوره
كانت البسمه ..تزلزلى كيانى
ما استمع فيها ملام ولامشوره
مركبي هايم .. وهى مرسي الامانى
وفي شواطيها بذر حبي بذوره
وابتديت ابدع لها الحان واغاني
ارسم الفكره على مليون صوره
ماعلي قلبي .. يغنيبه لساني
اسبر اغوار الهوى واقطع بحوره
لين ذاب الشمع وسط الشمعداني
وانجرف قلبك ورى نزعة غروره
يامساومنى على (عمرى) ..تراني
ينكسر ..قلبي ..ولا أجبر ..كسوره
من شموخى ياخذ ..سهيل اليماني
والزهر ياخذ بعد ريحة عطوره
==============
اعجابك بشعري دليل عن التميز والنجاح
آقف من التقدير له ..واقدم ايامي ثمن
انا ترى شاعر تعلم من ظروفه والجراح
عطار احاول انى اصلح بعض ما افسده الزمن
اعيش همي فالمسا واكتب قصيدي فالصباح
وارسم على صدر الورق لوعه وحرمان وشجن
ياما كتبت من الحروف وراحت ادراج الرياح
دفنتها يوم المخاض بلا حنوط ولاكفن
===============
في ختام هذا اللقاء كلمة تود توجهها لجمهورك عبر اخبارية عفيف ؟
أولا أقدم شكري لإخبارية عفيف على إستضافتها لي وهي التي في هذا الوقت تحرص على ابراز شباب محافظة عفيف المبدعين بعيداً عن المجاملة وبدأت من المحببه لأهالي محافظة عفيف وبالنسبة لجمهوري أقول هذا فيض من غيض وسأعدم بالجديد والمميز في قادم الايام واعتذر على الاطالة عليكم واكرر شكري وتقديري لكم