سحاب في سماء الزلفي

نفيضه مثل مذعور النعام اللي به جفالي
سريع وللمطامن ماحدر سيله يسند فوق
ألا ياسرع ماياطا العدام ونايف الجالي
من العارض نشا وخشوم مزنه مثل حمر النوق
بعد حاذا لنال طويق هل الغيث همالي
حليّ اللي مع شيوخ الجهامة منزله مرموق
على اسم العز عز الخيل عزه بالسماء العالي
ملكة الشيخ ممدوح السجايا لين شب الطوق
توهج كوكبه بالمجد نوره يشعل اشعالي
قطع له سكة صوب المعالي تقطع المعلوق
ومن يبغي براد العز ياطا مثله الصالي
وصفته واذكر الله لاانطلق ما قد ثناه العوق
كما ذيب حداه الجوع في مضما الخلا الخالي
إلى أقبل كنه المارد وإلى أقفى كنه الزاروق
سبيق غير ضله مابراله كل خيالي
سبق جرد السبايا دايم يلحق ماله ملحوق
يحق لمثله بفعله على أهل الخيل يختالي
بقى لوله جناح عززلجام الرسن بسبوق
كما أن الحر لوما ماطار أصيل ومعدنه غالي
لك الله ياحصان كاسب طاق الرهن مطبوق
بعد ماصار بالميدان تضرب فيه الأمثالي
خطفت الكاس من رف رفيع بذورة الشاهوق
وأقول أنك جدير في أكيد ولايوري لي
تعديت أربعين وكل جولاتك سنع ووفوق
وخليت السبيق بساقتك يقعد هو التالي
يعود الفضل للي بارع بالمجد لك طاروق
مع الشيخ الكبير اللي خطاك بفضله طوالي
عسى فيك البقاء ياللي جميلك يسبق المنطوق
متى ما قيل بك قول تكلم عن الأفعالي
كرم حاتم يتمه حلم الأحنف مع عدل فاروق
على وفاء السموؤل جامع موروث الأجيالي
أنا مهما وصفتك لك على أبيات القصيد حقوق
وبنات أفكاري أحتارت تجيب اللي على بالي
إلى قلت البحر واثر البحر طبعه ماهو ماثوق
وإلى قلت القمر بآخر لياله يمسي هلالي
واقول أنت الصقيل اللي من الماس الذهب مطروق
يبين اليا أضرست شمط السنين وكنهب اللالي
ترى يوم أمدحك وأنا أعتبرت المدح لك مخلوق
ومن ذكرك عرفتك من قبل ماشوفك قبالي
سحاب في سماء الزلفي نشأ ماله رعد وبروق
نفيضه مثل مذعور النعام اللي به جفالي
شعر /سعد بن سعود العواد
الزلفي