تدرون لو الود ودي.. وسألتوني.. من اللي انصحكم تعرفون عليه.. كان نصحتكم تعرفون على الدكتور محمد الحمد.. يقولون المدح في الوجه مذمة.. لكن هالرجل يمكن هو الوحيد اللي اسمه ريس جمعية ولا يشخص على الناس بزعم انه دكتور والا ريس جمعية..عندنا الواحد لا صار دكتور يا دوب تعرف تتفاهم معاه من كثر ما هو يطالعك بنص عين.. وشلون عاد لا صار دكتور وريس جمعية.. حلها.. يبي لك اسبوعين مراجعات عشان تقدر تدخل على مكتبه..الدكتور محمد الله يوفقه.. تلاقيه في كثير من المناسبات ما خذ ماصته وكرسيه وكتيباته حقات المستهلك وجالس مرتز عند الباب.. اول ما تشوفه.. تحس انك شايفه بس ما تدري وين.. من منظره المرتب تستبعد انه ممكن يكون زي اللي يكتبون معاريض عشان خطهم زين، جالس ورى ماصه عليها يمكن خمسين شغلة بين كتاب وكتيب وبروشور ووراه كم ستاند، اذا ما نتبهت وقريت الاستاندات لا يمكن تتوقع أن هالادمي مهم وكل الناس تدور عليه، شي مو معقول. ولا يمكن يصير في بلدنا، اقسم لكم بالله ما صدقت، اطالع في خويي اللي معي، ياولد من جدك هذا ريس جمعية حماية المستهلك، يوم سمعني اسأل خويي، على طول اخذ ورقه من الاوراق اللي قدامه ومدها لي وقال: خذ يالله اكتب المعلومات وخلك عضو معانا في الجمعية، بعد ما فقت من الصدمة، وحمدت الله ان الدنيا فيها خير دام عندنا ناس بهالتواضع وبهالعقلية الكبيرة، والله لو في جمعية حماية المستهلك الف تقصير يكفيها نجاح ان ربي وفقها بريس زي الدكتور الحمد، كل اللقافة اللي تجيني باوقات غلط قدر الدكتور الحمد يجاوب عليها بثقة وهدوء، قلت له وانا مسوي حالي فاهم واقلد الصحفيين: يا دكتور دام انكم ما عندكم الا الكلام ولا لكم سلطة على أحد ليش ما تسمون انفسكم جمعية توعية المستهلك دام ما وراكم حماية له؟ ابتسم وعرف اني مقهور ومدبولة كبدي من التجار مو منه وقال: صح عليك، بس حنا نعلمك كيف تحمي نفسك، يعني نعلم المستهلك كيف يحمي نفسه، ندلك على الدرب كيف تاخذ حقك اذا تعرضت لغش او ظلم، طبعا الدكتور الحمد يقول انه طال الزمن والا قصر راح ياخذ نسبته اللي عشرة بالمية من الغرف التجارية، وواضح انه رجال قوي وقد كلامه، وحنا نقول يا دكتور ليش ما تجيب لنا حقوقنا من التجار والشركات باثر رجعي، يا كم حق لنا راح في بطونهم ولا عرفنا كيف نطلعه، طبعا الدكتور اللي مخلي شخصيته قوية ما شاء الله عليه، انه للحين ما يعرف المثل اللي يقول «قال انفخ يا شريم..قال مامن برطم»، يا حبي لك يا دكتور اجل متمسك بحقوق الجمعية لو بأثر رجعي وناسي حقوقنا، حبينا صراحتك بس يا خوف قلبي لالهطت جمعيتك القروش من الغرف التجارية راح تصرفها ببروشورات وتنسى اننا في انتظارك..هيلب..هيلب .
