مليون ونص (كحيان)!

طبعا صارت الدنيا كلها على كبرها كنها بيت واحد من تطالع من السطح تشوف وش قاعد يسوون بالحوش، ما عاد فيه شي ما يعرفه الاعلام وعلى قولة المثقفين اللي يحبون القراطيس، العالم اصبح قرية صغيرة، مدري وشلون قدرت دراسة، يقولون غير رسمية، انها حسبت عدد الناس اللي حالتهم على قد حالها، لقوهم مليون ونص فقير، شي يوقف شعر الراس، معقول يا ناس حنا بلد الاسلام عندنا هالعدد الضخم، مليون ونص؟ كم واحد منهم يا دوب يمشي حاله لآخر الشهر، وكم واحد مشاها ديون في ديون، وكم واحد ما هو يلاقي يوكل عياله، كم طفل بينهم ينام بلا عشاء؟ وبعض شركاتنا زكاة مالها اكثر من 300 مليون ريال، ما ودي احلف ان فيه عشر شركات لو طلعت زكاة مالها ما عاد فيه فقير بالعالم العربي كله مو بس بالسعودية، اكثر تجارنا الله يهديهم اول ما يسوون شركة يخلون راس مالها نص مليون ريال عشان منحاشين من الزكاة، لو كان راس مالها مليارين، تجارنا كل ما تزود فلوسهم كل ما يزيد جحودهم لعيال بلدهم، كنهم ما كلوا لحمنا ورمونا عظم، اللي نكبونا في الاسهم تجار؟ واللي نكبونا في الحديد والاسمنت تجار؟ واللي رفعوا الاسعار تجار؟ واللي سرقونا في المساهمات العقارية تجار.. واللي يتحكمون بكل شي تجار.. ليش نزعل من الصحيح؟