على جدار الليل

ضيقه .. سهر وهموم .. ليل وتفاكير
غنت بنا الدنيا على كل موال
على جدار الليل نكتب تعابير
يشرق نهار وفيه تحطيم الآمال
ياحسرة الراعي بهاك المغاتير
يا عبرةٍ هلت على خد رجال
ذاك الغدير اللي زهى بالنواوير
ما مرّه الطرقي ولا جاه خيّال
دنيا اتعبتنا بالعنا والمشاوير
لا جانا مندوبٍ ولا راح مرسال
هذي مواري الحظوظ المعاثير
ما جابت الأيام شيٍّ على البال
ما جابت الأيام صدفه بها خير
الوقت طبعه دوم خاين وختّال
يا روعة الأيام يوم اني صغير
ما كنت افكر اني اصبح بها لحال
حالي تعيسه والليالي مدابير
راضي بمقسومي على كل الأحوال
ليتك عرفتي يا عذاب الغنادير
بركان قلبي فجّره منك زلزال
ما كنت أظن بيوم تبدي تناكير
ما كنت اظنك في عنا القلب تختال
مني خذيها دون سابق معاذير
جيتيني حلم بليل فجأه وثم زال
الله كريم يبدل العسر تيسير
هذي رموز وتكفي عن بعض الأقوال
فندي الغوينم