قصيدة رثائية في والدي عبدالله بن مطلق بن سرحان العضياني العتيبي - رحمه الله رحمة واسعة -

الرجا فالواحد اللي رحمته تشمل عبيده

وش يعزى فيك وانت اللي على كل شي فقيده
من عماد الدين ليا حد السوالف والمثايل
كل شيٍ مفتقدك وخصٍ رجال العقيده
والعشا والطيب والمسترفده واهل العدايل
والاذان وروضة المسجد وخيرٍ تستزيده
بالتنفل بالصيام وما يليه من الفضايل
رجل واحد مير تحسب في زمانك عن بديده
لا تزعزعك العلوم ولا تحاك الك الحبايل
عيبك انك ما تنافق والتصنع ما تجيده
وان ما لك مبغض الا من مشى درب الرذايل
وعيبك انك ما تجيب من العلوم الا الوكيده
ما تحب الكذب والا تدعي فعل الفعايل
ومن كثر ماله من العالم ومن زود رصيده
دام ما هو مخلصٍ لله ما انت بعنه سائل
ولا تهاون في الحقوق وتكره النفس البليده
جل من ميزك عن ربعٍ يضيعون القوايل
والامل في كل شبلٍ سار دمك في وريده
العيال اللي على اسمك راضعين الطيب سايل
والرجا ف الواحد اللي رحمته تشمل عبيده
يرحم اللي بالعمل مرهون من تحت النثايل