خابت الآمال

خابت الآمال عندي والظنون
واحترقت بنار حسرة وانتظار
يوم جتني تسحب الخطوه بهون
مقبله ياسعود لي باتعس نهار
امتلكني يوم ناظرته سكون
والهلع والخوف وسط القلب صار
طالعتني والشعر غطى العيون
نظرته فيها مع الحزن اعتذار
المدامع كنها وبل المزون
ما حصل للزين ما كان اختيار
قلت قولي ياحياتي ياحنون
وجاوبيني ياحياتي باختصار
قالت الأيام ماتوفي تخون
كل اماني دنيتي صارت دمار
السفر والبعد لابده يكون
غصب عنا والزمن لا شك دار
وابعدت والقلب تملاه الطعون
من وداع ٍ شفت انا فيه انكسار
بعدها عايش حياتي وش تكون
دنيتي من بعدها صارت مرار
كل ما في دنيتي بعده يهون
مالها في ناظري أي اعتبار
بعدها ينتابني مثل الجنون
حالتي من بعد خلي بانحدار
صالح سليمان البلوي – محافظة العلا