لا تزيد الجرح

يكفي زعل يا عديل الروح وعيوني
يكفي ألم لا تزيد الجرح وفتوقه
الحزن في داخل الاضلاع مسجوني
في داخله نبرة اللوعات مخنوقه
شربت من كاس صدك واختلف لوني
مفعوله اليوم تل القلب بعلوقه
سليت سيف الهجر من دونك ودوني
ضلوع قلبي من الهجران مسحوقه
البعد قاسي وهذي سبت اطعوني
سحاب همي كبير ولاحت بروقه
بالله قلي علامك زدت فشجوني
شمعة هوانا من الاحزان محروقه
ياللي سكنت المحاني حب واجنوني
مشاعري في وريد الحب مدفونه
غلاك في داخل الخفّاق مكنوني
باقصى الحشا والمحبه داخل عروقه
من سبتك دمع عيني ضايق اجفوني
ضيّعت درب الهوى يا زين وطروقه
غيرك من الناس لله ما يهموني
يا للي سرقت الخفوق وصرت معشوقه
محمد مرزوق السميري