واهج الماضي

دعاني للهوى داعي فتن قلب الحزين وراح
وأنا لبيت للداعي من أعماق الفواد وجيت
خذاني بارق أحلام (ن) على ذيك النوايف لاح
دفعني هاجسي صوبه مشيت الدرب ما حسيت
على خط الحبيب اللي لعب بي حبه الفضاح
قطعت الدرب يطويني حنين (ن) منه ما مليت
كفخ قلبي مثل طير (ن) زهمله رامي الملواح
كفخ حين انتهض حلم (ن) بقلبي له زمان (ن) ميت
بدا صمت السنين اللي حفظته داخلي ينباح
تروعني هجوس (ن) لا طراله طاري (ن) فزيت
بدت سلواي من هم الزمان اللي رحل تنزاح
بدا يغرق فوادي والفواد ليا غرق وليت
نطحني واهج الماضي مثل موج (ن) كسر سباح
دخلت بدومة الأخطار لاهالك ولاعديت
تصور لي من الماضي بقايا كنها الأشباح
حقايق يلفظ الواقع صورها تشبه (الأوبريت)
توارت عن نظر عيني شموع الشوق والأفراح
قناديل السرور اللي معاها بالزمن سجيت
إذ الحاضر قتل حلم (ن) مضالي وانطفى المصباح
وحالت دونه الأوضاع مهما قلت أو سويت
نزع حل الرجا فيني مثل ماتنزع الأرواح
تسابق داخل احساسي هموم (ن) كنها الكبريت
أباخذ مصحفي واقرا واباخذ في يدي مسباح
واسبح بسمه الأكبر ولا اشتدت علي صليت