يا وحشة الدنيا اذا صرت مشتاق شوق المريض الي يدور علاجه

طرح بيت الأسبوع الماضي الشاعر حمد عبدالله الوايلي من حوطة سدير، وهو بيت وجداني يقول:
يا وحشة الدنيا اذا صرت مشتاق
شوق المريض الي يدور علاجه
وقد كان صدى البيت المطروح:
يا وسعة الدنيا .. إذا كونها ضاق
يا سلوة الخاطر وضحكة حجاجه
الوقت برد الليل لا هبت أشواق
والحب ناره .. والحبايب سراجه
لو الهوى يمشي على حسب الأوفاق
كان القدر .. يسمح لنا ونتواجه
أنا الحبيب اللي حرق روحه إحراق
ولحاجة أحبابه خسر كل حاجه
عبدالله بن حمد الوايلي - الأحساء
الحظ مكتوب على بيض الاوراق
لازم يعيش الشخص حسب اندماجه
خلك نقي لا وصل نشف الارياق
واصحا تصير من الجهل في عجاجة
لا تنخدع مابين زيف وبراق
ناس تزين لك دروب السماجة
علي الرشيد - رياض الخبراء
ياصعبها لاصار في يوم الفراق
وبين الاحبه صار صعب المواجه
يشتاق له وتزيد بالقلب الأشواق
شوق السجين اللي تعذر إطلاقه
عبدالمطلوب البدراني - محافظة وادي الفرع
شوقني اللي مبسمه مثل براق
ريته طلع من قصر لولن دراجه
بعد اجتمعنا ليت مايحصل افراق
ولا يجي بين المحبين حاجة
ونا على ابواب الهوا دوم طراق
لو كان فوق الجدي وأعلى ابراجه
محمد عبدالله الشهري _ جبل اثرب
كماالحبيب اللي ذبح حاله أفراق
على وليفه يرفع الصوت هاجه
دمعه على الخدين له يحرق احراق
يمسي ويصبح بين هم وخلاجه
صبرن جميل مع وتحية والأشواق
و عليك بذكر الله تجيك انفراجه
صالح محمد محارب البشري- الرياض
مَا ظَنْ وحشة غَالِيْ الروح تنطاق
تضيق بَكْ دنياك تقفل ابراجه
وتضيق بَكْ دنياك لا صرت مشتاق
تقل القراح إن كنت ضامي بحاجه
والمشتقي دنياه ماعاد تنطاق
حتى يزول اللي يعكر مزاجه
وشوفة عزيزٍ لِهْ على الدوم يشتاق
هو بسمته هو فرحته وابتهاجه
سعود عائش الحربي - جدة
وما احلى الرفيق اللي تحبه من اعماق
الطيب في وجهه وضحكة حجاحه
دنيا تروع ولابه احدن بها راق
دايم بها المسكين طافي سراجه
ياشينها ياربعنا بعد الافراق
وكم من رفيق ضاع بسبة مزاجه
محمد بن عبد العزيز الخنيفر- أشيقر
اصبر يا ابن وايل على حر الاشواق
والصبر باذن الله يجيك انفراجه
با شين حبٍ يتبعه هجر وافراق
وكم عاشقٍ قبلك تعكر مزاجه
يا الوايلي كان انت للترف مشتاق
رح له وخذ لك جولةٍ باادراجه
أخوكم زبن مقبل العنزي - بريدة
بيت الصدى يالوايلي يفتح افاق
مايقنص الصقار بفرخ الدجاجه
وانت تخيل مع المخاليق براق
وكلن على ماقيل حسب مزاجه
مع لمة العشاق تزين الاخلاق
وان ضاق صدرك قم للرب ناجه
الله يزيد ارزاق ويقلل ارزاق
ومن جرب الدنيا يعرف خراجه
شجعان العتيبي - الرياض
لاتغرك الدنياولاتصير تنساق
ولاتطاوع اللي ماشي في مزاجه
واسلك طريق الخير ولايجي بك اخفاق
وعقب العسر والضيق تلقى انفراجه
ودنيا بلا طاعه فلاهيب تنطاق
اسلك طريق باخص في خراجه
ريان بن محمدالخنيفر - أشيقر
بيت الأسبوع
كتبه للصفحة الشاعر علي الرشيد من رياض الخبراء، ويقول:
صندوق سرك اقفله خمس قفلات
واحرص على المفتاح من كل عاوي
نستقبل صدى هذا البيت بهذه المناسبة خلال أربعة أيام من نشر البيت على إيميل الصفحة:
rb-khozama@alriyadh.com