صوت الصورة

الحمامة يوم شافت ماتمنت
غفلت عن نفسها ثم صوروها
وقعت فوق الغدير ولاتهنت
المصور والقوانيص أذعروها
عبدالله بن دواس - ساجر
ياطير عجل لا يجوك القنانيص
روح قبل مافي الشبك يطرحونك
مقصصين الريش في البر تقصيص
في ذمتي لو جوك ما يرحمونك
ماجد عبدالله المحياني - الخرج
ياطير ياللي تشرب الماء وترده
هو بك ظماء ياطير والا تسلى
أشرب منه كان أن نفسك توده
وإلى رويت بما نبألك تعلى
زبن مقبل العنزي - بريدة
يا الحمامه يا جمال الدوح يارمز السلام
ما حلا منظرك وأنتي مطمئنه تشربين
لكن أشهد يا الحمامه من يلومك ما يلام
ياما هيضتي المولع لابد يتي تسجعين
عبدالعزيز بن عبدالله البواردي - شقراء
اشربي يا علها تروي ظماك
وأقهري منهو على صيدك ظماوي
اخبري امك وقولي لقصراك
التحيه من خفوق اللي شقاوي
محمد بن فهد الجلعود - سميراء
واهنيك يا لحمامه وارده تشربين
أشربي وأرتوي يوم ربي سقاك
جعل رباً سقاكم يسقي المجدبين
نحمدك من كريم يوم هذا اعطاك
عبدالكريم عبدالرحمن السلوم - القرائن
أشربي ياحمامه شيٍ يجيك
وارحلي عن إسلاح ما يدور سواك
ألف واحد بدربك واقف يحتريك
وألف واحد يدور ويتمنى يراك
فهد أحمد البهلال - الزلفي
بالخزامى شفت لي صورة حمامه
مرقبه من فوق مشرافاً طويل
مبعده عن البشر تبي السلامه
والسلامه ما تبي عنها بديل
عقلا خزن العنزي - تبوك
حمامة القوقسي لادنقت بالغديري
تشرب الماء ويبدا مثل عقداً فريد
رايعه بالسكون ورايعه بالمطيري
كل لحظه لها ذوق وفن جديد
صالح عبدالعزيز السويح - روضة سدير
طير كدري كن هذا الطير يتزحلق وينقر بالبحر
أسود المنقار في فمه لقط حاجه وخطه دائري
كل حي بهذه الدنيا يبي عزم وصبر
يعتمد في قوت حاله لكسب الرزق يجري له جري
جلعود لافي الشمري - حائل
إشربي يا حمامه وإطربي
في غدير عذبٍ وصافي
مشتاقة ما أظنه تهربي
وين قناصه اللي ما يخافي
صالح إبراهيم الدبيان - عنيزة
هني ياللي واقف يشرب المي
الله من شعب وقاع وطاها
ترجف فرايصها تقل لابسه شي
خوف من اللي لو لمحها عطاها
سعد الحماد - روضة سدير
يابكر لاوهني الطير
وليا بغى ديرته زاعي
لاشك وقته به التغيير
صيداً بلا حاجه ولا داعي
عبدالرحيم بن منور السلمي - تبوك
يازين شكلك يم الألحان زيناه
وأنتي على جال النهر تشربيني
يا ليت منهو بندقه وسط يمناه
يرميك ويشبع من لحمك السميني
خالد بن ناصر المخيمر - روضة سدير
يا لقمري يالمسكين وشبك تعنيت
وش حدكم على البحر يالسنافي
عن بيتك يا شين وشبك تنحيت
يالله عسى مشروبكم بالعوافي
منور بن عزاب بن طلق - تبوك
الحمامه واقعه فوق الصخر
لاجل صيده لزوم عيالها
لكن التفكير فيها والحذر
خايفه والله عليم بحالها
محمد بن عبدالعزيز الخنيفر - أشيقر
على جال الغدير بلي كبدك يايحامه
ومن صافي زلال الماء أروى ضماها
ألا يامحمد بكور الوسم ناشي غمامه
عساها من القبله ترادم ويظلم سماها
حمد عبدالله الوايلي - حوطة سدير
عقب الظما كرع بصافي من السيل
وأدهن عطش كبداً ظماها له شهور
يا طير غرد وأرفع الصوت بالحيل
وأشكر عطا ربك بعد عجف ودهور
عبدالكريم النغيمشي - الربيعية
كن الحمامه موقعه على ناقه
باقي متر والمطر بيغطس الباقي
منظر يخلي اللذي زهقان وأخلاقه
زفت يكيف على سيل وبراقي
سعود بن عبدالعزيز الهزاع - نعام
نرحب بمشاركاتكم الشعرية حتى مساء الاثنين على الفاكس رقم 4871070أو الإيميل الخاص بصفحة الخزامى: khozama@alriyadh.com
زاوية (صوت الصورة)..وياهلا.