طريق الحب

على نفس الطريق اللي مشوا به قبلي العشاق
مشيت أسابق الخطوة وأمني القلب باحبابه
أنا أدري ان هالدنيا طبيعتها لقا وفراق
ظروف الناس فيها في كثير أحيان تتشابه
ولكن من يصبرني على جور الزمان العاق
جروحي هي وآلامي وتعذيبي من أسبابه
حبيبي كلما همتني الدنيا وصدري ضاق
تذكرتك لقيت الكون أوسع وأكثر إرحابه
فرحت وقلت لابد من نهايه للفراق الشاق
ومات اليأس من كبر الأمل لي صرت أنا أحيا به
حبيب الروح كل مالاح لي من يمكم براق
خفق قلبي وحسيت ان شوقي والغلا ذابه
عللي حبك ينازعني قصيدي واسأل الأوراق
لك الله ما بقي دفتر خلي من شعر وكتابه
وهذي حالة المغرم إذا هامت به الأشواق
يدور له على من يبلغ المحبوب باعجابه
حبيبي وان تفارقنا غرامك يسكن الأعماق
ولكن لي سؤال ينتظر من عندك اجابه
بربك هل مثل ما شتاق لك يا سيدي تشتاق
إذا جبت ابنعم ولا خسارة عمر عشنا به
مبروك بن سالم بن ماضي