عواكيس

اخي معكوس السلام عليكم مارأيك في ما يحصل في نادي النصر بسبب حسين عبدالغني حتى صار وكأنه رئيس النادي؟
عبدالعزيز العيباني - المجمعة
* اترك الإجابة للكابتن ماجد عبدالله مع التحية.
*الدكتور معوكس بعد التحية والاحترام بحكم خبرتك الطويلة من تتوقع يتوج بطلاً للدوري ومن تتمنى يحقق البطولة؟
موسى الدوسري - الخرج
* اشوف أن الدفع الرباعي اختفى وجانا «المحلي ولا أحلى».
*الأخ معوكس المحترم هل أنت مع استمرار اتحاد كرة القدم الحالي أم انتخاب اتحاد جديد؟
فهد الرشيد - الرياض
* مع استمراره خاصة أنه قادنا للتأهل إلى كأس العالم وتزعم القارة!
* أبو العواكيس بعد التحية والاحترام تتفق معي أن بطل «دوري جميل» هالموسم خارج حسابات التوقعات بسبب ضعف المستوى العام وتساوي كفة جميع الفرق؟
خالد المطيري - الرس
-ما اشوف في الدوري الا الاسطورة «ابو عبدالله» اللي غير في نكهته وخلاه تركش كوفي.
*صديق الملايين معوكس المحترم من بيشجع جمهور الهلال في مواجهة كأس ولي العهد المقبلة بين الهلال والشباب؟
طلال العتيبي - الدوادمي
-ما يبي لها ذكاء يشجع فريقه وأن خسر يصفق لسامي!
*الأخ معوكس بعد التحية والاحترام وش تعليقك على عودة المهاجم الخبير ناصر الشمراني لصفوف المنتخب بعد غيبة وهل سيخدم «الأخضر» في المواجهات الحاسمة؟
فهد الراشد - المزاحمية
* حتى مارفيك عاد بعد غيبة كان نائم في الأستوديو التحليلي!
*أبو العواكيس المحترم وش رأيك في مستوى الفيصلي هالموسم وهل تتوقع ان يصمد من دون خسارة في الدوري؟
خالد العبدالله - الرياض
* شكل العنابي خطير وعنده شيء ذا الموسم!
*الاخ معوكس المحترم من أفضل معلق رياضي في الملاعب السعودية ومن المعلق اللي ودك ما تسمع صوته جاوبني بصراحتك المهودة؟
أحمد الخالدي - الرياض
* اللي صارخ على هدف وقال انه عالمي وهو صدفة.
*أبو العواكيس وش رأيك في مستوى أجانب الهلال ومن يتحمل مسؤولية تواضع مستوى المهاجم البرازيلي ليو؟
فهد القحطاني - جدة
* كلهم صب قهوة ويا صبابين الشاي زيدوا حلاته.
*الاخ معوكس بحكم خبرتك الطويلة من تتوقع يكون رئيس اتحاد كرة القادم؟
بندر الزيد - بريدة
* مارفيك أو المساعد أبو نسب!
*هلا معوكس برأيك اذا بعض القنوات الرياضية ما عندها برامج وش الحل؟
احمد الحمد
* بريدة
-الحل يرجعون للأرشيف وخذ يا مباريات طقها والحقها.
* الاستاذ معوكس بعد السلام والتحية هل انت مع الكابتن ماجد عبدالله في نقده لقائد النصر حسين عبدالغني ام ترى انه قسى على ابوعمر كثيراً.
سطام العتيبي - الرياض
* اللي في المدرج يتفرج!
*الناقد الكبير معوكس تحية طيبة وبعد إذا كان هذا مستوى الهلال ومستوى اجانبه انا ما اتوقع انه ينافس على لقب بطل دوري جميل ولا حتى بقية المسابقات يعني بيطلع من المولد بلا حمص
عبدالعزيز السلمان-الرياض
* وانت الصادق بيطلع من الموسم للعريجا.
*السيد معوكس ودي اعرف وشلون مساعد مدرب المنتخب مارفيك يدرب فريق هولندي يعني يشتغل شغلتين؟
مساعد العتيبي-الرياض
* ونسيبه بعد يدرب ويحلل.
*الغالي معوكس انت ما شفت الليث اقول يازينة من فريق بصراحه يمتع مع الكابتن سامي الله يكفيه شر الحساد؟
الشبابي -عبودي -الرياض
* يمتع بس شوي .. شوي على رأس الكوتش راح شعره من الحبحبة!
* الناقد الساخر معوكس متى نراك محللاً فنياً في إحدى القنوات الرياضية الاجنبية تحلل الدوري الانجليزي او الايطالي وان بغيت الإسباني
سامر العلي - جده
* قريبا بجانب مارفيك بس ترى عرض القناة اكون الفودة!
*كبير النقاد معوكس تحية محبة وتقدير وبعد هل لديك مشاريع مستقبلية مثلاً مدرب او تاجر عقار او شريطي مواتر ولا في بالك شغلة غير؟
سلطان الريس- الرياض
-ما في بالي الا طلبات ام العيال اللي ما تخلص!
مع تحيات معوكس وسلامتم