فرعونة الهرج

هيه يافرعونة الهَرْج الرهيف وتاج راسه
سيّدة اللي يسمّونه قصيد وسِتّ بيته
لو دريتي وش جبَرْ شاعِرْك يبلع موس ياسه
جرحه اللي يذكره ويقول للعالَمْ نسيته
في زمانٍ صار فيه الشعر تطبيل ووناسه
لا يعاني اللي أقول ولا يقول اللي عنيته
والله ان البرد عِزّه لا احْرَقْ الحَطاب فاسه
اسمعي علمي وانا لا قلت علمٍ ما ثنيته
كان يا ما كان والرجال ملبوسه قياسه
لين صرت أفصل أطرافي على ثوبٍ شريته
كلما قلنا (أواه) مْن الوجع قالوا سياسه
واكملوا عنّي كلامٍ والله انّي مابديته
واشهد انّي مغرم بْهَذا الوطن واحبّ ناسه
قُلْ وطنْك وكل عرقٍ بي يلبّي لك: فديته
من بحَر فيروزه لْخضرة نَخَلْه إلى يباسه
لو حقيبة غربتي تاسَع تضاريسه خذيته
بس أنا رَجْل الوجَعْ يلبسه من راسه لساسه
كلما أكسر ضِلْع في قلبي على كسرٍ طويته
انكسارات العمل والركض وايام الدراسه
المسافه بين ما كنت أطمحه واللي غديته
قلت مرّه يا (علي) من شَلّ راسه طاح راسه
رَدّ صوتٍ داخلي والله يطيح إذا حنيته.