عيت تطوف

وأعذاب المشقى من فراق الهنوف
قلب يا أللي من الضيقات ماهو خلي
كثر ما صادفنك في حياتك صدوف
ذي ثلاث تتالى كلها تقتلي
لا تشاليت من وحدة للأخرى تحوف
أشهد إنك من صدوف الزمن ممتلي
جيت تبغي تطوفها و عيت تطوف
وقّفت وقفة منها الفواد يغلي
من سبايب غرير مد لي سلك صوف
قووم يا كيكة ابن فطيس مدري جلي
أتلع ناف عن كل المزايين نوف
ما لوصفه شبيه ولا لطبعه حلي
لو يلد النضر صوب العذارى عيوف
ما لقى له من أطلقهن جليس و سلي
لو بأوصف لو إن العذب فوق الوصوف
العذارى دداسن و الغضي بنتلي
خابر إن التعب معها مهوب امخلوف
خص لا عودت عقب المزوح صملي
لا سقى الله علي ليل حدته الضروف
يوم جتني و قالت لي دروا بي هلي
وأرخت الراس و أغضت لي بعكش صفوف
واختفى صوتها و الدمع هل سبلي
قلت يا بنت ما لي عند غيرك شفوف
كيف ذا الغمة أللي بيننا تنجلي
والله إني ما بي درب ماهوب (امعروف)
والدروب الضعيفة ما قربها شلي
قالت عيال عمي يا مبارك جلوف
حاجريني من أدنى كل منهم ولي
كل منهم قطوع صارم ما يروف
جعل ما هو نصيبي من نتاج عملي
قلت واليوم قالت مثل مانك تشوف
استر الله يبيحك ما خذيته علي
وادعتني .. و أنا توي بحالة وقوف
مع خفوقٍ من الضيقات ماهو خلي
مبارك بن محيا