ثقافة الحج

اسمع الناس صاروا يضيفون كلمة (ثقافة) قبل اي كلمة، السفر حطوا له ثقافة وصرنا نقرأ ونسمع فلان ماعنده ثقافة سفر، عاد هذي ربعنا محتاجين ألف سنة عشان يحلمون انه ينقال عنهم مثقفين سفريا، ثقافة الخلاف، وثقافة سماع مسجل السيارة، وثقافة الفوز، وثقافة ضربة الكرنر، وثقافة الاحتراف، عاد ثقافة الاحتراف مثلها مثل ثقافة السفر، صار لهم كم سنة وهم صاجينا يطالبون بثقافة الاحتراف، وبكل العالم ضابطة ووش حليلها الا عندنا سبحان الله، نرجع لموضوعنا، هالايام أيام فضيلة، الله يعيدها على كل مسلم، وانت ودك يالواحد لاحجيت انك قبل ما تحج ما تخلي لا كبيرة ولا صغيرة إلا تسأل عنها، لان فريضة الحج اذا سويتها تحس سبحان الله ان فيه جبل كنت شايله على اكتافك وراح، والله يا إخوان في بعض الناس يروح يحج ومزلب ديون خلق برقبته، فيه واحد مرة بغى يعطيني بقس على جبهتي (تستاهل) بس عشان قلت له يا فلان قبل لا تحج رح اسأل شيخ عن تطنيش راتب الخدامة والسواق اللي برقبتك هو يجوز لك حج والا، انا ما فتيت له، انا اقترحت عليه، عاد عندنا حتى الاقتراح ينحسب عليك خصوصا اننا مجتمع افراده مولمين الزعل قبل أي شي، وبعض الناس يروح يحج وهو مفرك من العمل، وبعض الناس يروح يحج وكن بيت الله الحرام له هو لحاله، ياويل اللي يزاحمه والا يكدر خاطره، كنه قبل لا يحج متضارب هو والمدام في البيت، وبعض الناس متعود على الصرمحة والتسيب والإهمال، شخط سيارته من البيت ومسك طريق مكة ولا معه غير بطانية، ولا معه تصريح حج ولا جاب خبره، واذا حج تلاقيه بس يتبطح بكل مكان!