فنان المولات

ممثل ما له دخل بالفن، ويقال إنه دخل هالمجال بالغلط لأنه كان رايح يشتري استبنة لسيارته، ولقى نفسه فجأة فنان اسبير، والرجال ما هو خسران شي.. قال لك خل نشوف حظنا، وجيم كاري ماهوب احسن منا بشي.. طلع فنان الغفلة في اول مسلسل وكان دوره انه يصك ويفتح الباب.. بعد كم يوم سوى صفحة معجبين فيها 10 اشخاص فيهم واحد بس غيره!
مع الوقت وصلت صفحة المعجبين إلى 20 شخص من ضمنهم واحد بس ما يقرب له، وهنا حس اخونا في الله انه دخل الشهرة من اوسع ابوابها وصار كل مكان يروح له يسوي نفسه ما هو ملحق على الناس وهو محد حوله، واحيانا يسوي حركات اللاعبين يوم يطقون لك ذيك السماعات والنظارة الشمسية في المطار وهم راجعين رغم ان التوقيت في الليل، صاحبنا ما يعوق معاه أحد، ولو شاف الكاشير حق السوبر ماركت يطالع فيه بس قام وسلم عليه وسوى لك فيها أنا الفنان اللي أحيي جمهوري في كل مكان وتلاقي هذاك منتظره يحاسب اصلا ولا حسب له حساب! واحد يقضي يومه كله هجولة في مجمعات واعراس ومؤتمرات، ويروح عشان يتميلح ويذب وجهه رغم انه ما هو جزء من المناسبة ولا مطلوب منه يفتح ابواب ولا شي، وفي الأخير يقول لك«والله الشهرة صعبة..ماني قادر اعيش حياتي الطبيعية بسهولة!»