خطاب إلى سعادة الحزن

إلى سعادة حزني .. الله يجازيك
سلام .. واما بعد : فيني تأمل
خاويتني لو كنت ما ابغى اخاويك
حملتني ما لا كتوفي تحمل
طلعتني مني .. ودخلتني فيك!!
عنك اتدثر وانت فيني تزمل
وأخذت كل اللي يسدك ويكفيك
من دمع عيني.. وش بقا لك تأمل؟!
شلت الطعون الخضر ما بين اياديك
مر العمر وانت بطعونك تحمل
وابي اسألك فآخر خطابي واحاكيك
قبل السؤال المستحيل يترمل
فيما بقالي من عمر كيف اجاريك؟!
وكيف الدموع الباقيات اتجمل
ولو قلت لي همل حبيبك واخليك
بقول: كيف لساكن القلب اهمل
دامه يروح اليا ابتعدت بخطاويك!!
فانا على فرقاك .. ماني مصمل
فهيد الغيذاني