سكة التخمين

على حروة مواعيد السهر والشوق والتخمين
عرفت ان الفراق اصعب محطاتي وخاويته
لقيتك في طريقي يا اجمل اجمل ما تشوف العين
وعرفت انك طريقٍ صعب لكن غصب حبيته
تضيق إبك المسافة بين تعويذة جواب وسين
وأشوفك سالفة مدري فضا حلم وتهجيته
يقولون انكسر غصن السلام وضاع حلم سنين
وانا أقول انفتق مشرق رضاك ولا تماريته
عليك من العتب ما يكسي اطلال البيوت الطين
وعليك من الرضا ما يحتفل بك كل ما جيته
أسولف لك طرب مدري عتب وانسابك التثمين
وأشوفك حرفي اللي كل ما روّقت غنيته
احبك وانت تدري لو طريقك فيه زين وشين
وانا ادري لي بقلبك قدر وافي لو ما أبديته
ولكن المكابر ميزتك لو فيك بعض اللين
وانا من كثر ماني فاهمك طبعك تقهويته
تعال نبعثر أوراق الغياب ونحتضن غصنين
ونترك سكةٍ ما دونها الا عله وليته
هذا شوري ولَك في معجم زحول العرب شورين
تخيّر بينهم وان ضاق بي رأيك تناسيته