لحظة وداع

رفعت كفي .. ما قدرت أرفع الصوت
لو كان فالخاطر .. كلام ٍ كتمته
لحظه وداع .. وكنها سكرة الموت
ضاع الطريق .. اللي من أول رسمته
ضاع الطريق وصرت في الدرب مبهوت
مدري وش اللي فاتني ما اغتنمته !
العمر مرّ .. وراح مع فايت الفوت
صحيح ضعت .. وضاع حلم ٍ حلمته
إلا أنت ياللي قربك لروحي القوت
لو غبت .. يبقى وسمك اللي وسمته
يبقى كما نقشٍٍ على الصخر منحوت
حفظته .. بشكله ولونه وسمتّه
مهما الفراق أوجاع والبعد ممقوت
أصبح مصير ٍ من غلاك .. احترمته
دمع النصر لو طاح من (عين جالوت)
(عين العقل) دمع ٍ تكنّه .. حشمته
ذخرت لك يا فرحة العمر .. تابوت
فيه الغرام اللي بديته ختمته
يبقى الغصن لو ما بقى فالغصن توت
تحرك أنسام الذعاذيع .. صمته
سكّت .. وأنا من موادعك مكبوت
شي ٍ تجاهلته .. وشي ٍ فهمته!
حبل الرجاء من جور الأيام مفلوت
يا ليت قلبي عن غرامك عصمته
ياما .. بنيت بيوت وبيوت وبيوت
اليوم .. كم بيتٍ بنيته .. هدمته