للعيد فرحة في قلوب الجماهير

اللي لعادات السلف حافظيني
حنا بدارٍ عندنا قدرها غير
المملكة دار المليك الأميني
خادم بيوت الله طويل الأشابير
يعيش أبو متعب عمى للطامعيني
وسلمان أخوه اللي يقود الطوابير
عضده ولي العهد ذرب اليميني
آل السعود لشعبهم كلهم خير
وعلى شريعة ربهم ثابيتيني
عيال من وحد بلاده على العِير
على النضا واللي معاه اربعيني
عبدالعزيز اللي يكف المشاهير
جمّع نزايعها شمال ويميني
لملم شتات الشمل وارسل مداوير
لين استتب الأمن للمسلميني
وحنا مثل سم الجبال الشناظير
وحنا لهم درعٍ حصينٍ متيني
دون الوطن نرسي كما طويق والنير
مثل الجبال عزومنا ما تليني
ندحر عمى صلف الوجيه المقاشير
اللي لنعمة ربنا منكريني
الجاحدين الخاسرين المخاسير
للمملكة ونعامها حاسديني
ولاهل المناطق كلهم دون تقصير
اللي على عهد الولا صامديني
عني وعن جمع الوجيه المسافير
عبرت من قلبي وصادق يقيني
والخاتمة ماهل وبل الشخاتير
صلاة ربي للرسول الاميني
د. منصور عبدالله العريني السبيعي