بين الردا والطيب

البارحة جفني جفی النوم حده
أسهر وتسريبي هموم وتفاكير
خذتني الأيام روحه ورده
وأنا مع الأيام ذقت التحاسير
قضيت عمري بين هاته ووده
مثل اليتيم اللي رمته المقادير
ولا شكيت إلا على الرب وحده
علام ما يجري على العبد ويصير
رب كريم وبيده الرزق مده
المعطي المنان راعي التياسير
هو الذي ندعيه في كل شدة
حلال صعبات الأمور المعاسير
بيديه تصريف الليالي وعده
القادر الفعال مجري الأعاصير
اللي بسط سبع الأراضي ومده
الخالق المبدع بحسن التصاوير
كريم لا من جاد محدٍ يرده
فراج كربات العباد المفاقير
أرجيه ما أرجي ضعيف ومده
اليا عطى تضيق به وجهة السير
جماع مال وكل يومٍ يعده
واليا نقص قرشين عده مخاسير
صدره يضيف وكل شيٍ يشده
يعاف لذات الكرى والمسايير
هيسٍ ولد هيسٍ همومه تشده
عند اللوازم لا نصيته معيثير
بخيل جاه ومن يجيله يرده
ما حاش نعم ولا ذكر يوم بالخير
عباد قرش ومكسبه ما يسده
شحيح ما يسقيك شفه من البير
ورثٍ لابوه وورث خاله وجده
ورثٍ قديم وله مع الناس تذكير
هذا خوي الناقصه والمصده
ما هو خوي أهل الوجيه المسافير
اللي على درب المكارم مهده
كسابت المعروف روس المناعير
رجالٍ دروب المرجله ما تهده
لو جارن سنين الزمان المدابير
ريف الضعوف اللي زمانه يحده
وعون الرفيق اللي بلته المقادير
اليا مشت في لازمٍ تسترده
لو حال من دونه ظروف وعواثير
الله خلقهم للصعيبات نده
محدٍ يجاريهم طوال الأشابير
يقوله اللي بيح الوقت سده
شاعر وتطربله كثير الجماهير
حامد الذرعي