عواكيس

* عزيزي معوكس أنا أنشأت وأسّست نادياً وسمّيته «نادي العواكيس» ، ويسمى اللاعب .. «اللاعب المعوكس» .. ردة فعلك وش بتكون؟ وهل بتفكر تصير عضو لهالنادي او لو قلنا عضو مؤسس او رئيس او نائب رئيس النادي؟
عبدالمجيد العنقري
-ما مثلها رئيس قريب من الشو وعلى الدكة رجل على رجل ونعناع رايح وزنجبيل جاي!
* الى الحبيب الغريب عواكيس تهقاء او تهقاء ان الشباب سيحصل على بطولة الدوري، ادري بتقول اسال مفسري الأحلام مانيب سال أحد بس لا تقول بكرة وش دراك الذيب في القليب.
ابن الشباب
-الذيب في العريجاء!
* الاستاذ ابو العواكيس ويش رايك في بطولة دوري جميل ومن تتوقع يفوز بها؟
الهلالي ابوفيصل الدمام
-اللي يفوز الليلة واللي يعدل اموره في يناير!
* الاخ معكوس المحترم ماهو شعور اي لاعب سعودي ياخذ عقود ملايين هل يجيه النوم في الليل.. لو انت اخذو معك صفقة ملايين شعورك ايه؟
ابو صوصو متعب
- بعضهم وين ينوم معه وهو سرداد مرداد على قهاوي المعسل وآخر الليل يختمها بمندي ولا مثلوثه!
*الاستاذ معوكس وش رأيك في فوضى التعليق والبرامج من المسؤول عنها ومتى يتعدل الحال ونشوف اعلام مهني هدفه مصلحة الوطن؟
راشد الدوسري - الخبر
-اما اعلام مهني كثر منها والضيوف والمقدمين والمعلقين مشجعين!
* الناقد الخبير البو العواكيس كيف يسمح لبعض اعضاء جمعية الاتحاد السعودي ضد بعض الاندية ويتنططون بالفضائيات،، يعني القدوة صار يحتاج الى قدوة.. وين احمد عيد ما يعالج الوضع؟
سعود الفهيد- الرياض
-وش يعالج وش يخلي هذا يغرد والمشرف يحتفل بفوز فريقه على المنافس ويا قلب لاتحزن والخافي أعظم!
* الأخ معكوس اجمل ما قريت في عواكيس من القراء ومن هو صديقك من القراء كذلك بدون مجاملة؟
ابو صويان
- تبيني أقول أنت يابوصويان بدري عليك!
* الحبيب معوكس وش قصة الحكام مايميزون بين اللعب الخشن واللعب الرجولي.. صراحة ماتنلام الاندية لو طالبت بالحكم الاجنبي ويا ليت يجيبون بعد معلقين اجانب؟
عبدالله التميمي - الدمام
- ومعد ومخرج اجنبي في القناة!
* عزيزي معوكس عطنا رأيك بصدق وصراحة ان يتصدر النصر فهذا شيء وارد وأن يفوز على الهلال والاتحاد كذلك ليس مستحيلاً لكن الاحتفالات الجنونية والكبيرة هل هي طبيعية لفريق يسعى لبطولة الدوري والدوري لم ينته؟
سفير الحلة - الخبراء
-شكلهم إن فازوا بالدوري احتفلوا بمقر الامم المتحدة مع باكي مون خاصة عنده العضوية الشرفية!
*صاحب المليون رساله ابو العواكيس تحية محبة وبعد: لوصرت شجاع عكس مالمسته من شخصيتك وسويتها وأعرست مسيار وقابلك واحد في الشارع او دق عليك وش ترد عليه؟
أحمد الحمد - بريدة
-مسيّر لاتكلمني!!
*قاهرهم وحابس دمهم ابو العواكيس تحية طيبة وبعد والله زعلني ابو علي حسن معاذ ياخوي قلب على فريقنا الليث وش قصته نسى العيش والملح
الشبابي -مساعد الفهد-الرياض
-شكله ماخلى شي مانساه العيش والملح والمطبق والقلابة!
*الاجمل والاملح الساخر معوكس بعد التحيه والاحترام:
نحن عشاق العميد بصراحة زعلنا الرجل الحبيب الطيب ريسنا محمد الفايز ليه قدم استقالته اشوف انه استعجل وانت وش تشوف؟
سلطان السليمان - جدة
- وين استعجل معه.. الله يلوم اللي يلومه جاه شيء كنه سيول جدة.