* وش رأيك ورياضتنا صارات شكاوى واتهام ومحاكم ماعاد باقي الا العجراء الله يكفينا الشر بس تعرف شي مصخوها اعلام الرياضة وش الحل يابو العواكيس؟ اخوك ابو ريال - الحل الطرد مع ابو عجراء! * الاخ معكوس المحترم ماذا سيحدث لعشاق النصر لو حققوا بطولة الدوري هذا العام؟ متعب الشمري - على شكلهم مع الصدارة مايردهم الا الاحتفال في مقر (الفيفا) برعاية بلاتر! * معقولة يامعوكس فيه شخص قال لأحد الاطباء ابيك تنهي حياة ياسر القحطاني في الملاعب.. وبعدين ياحبيب الكل وين اللي استضافوا من غير اهل الرياضة عشان يتكلمون على سامي الجابر.. وين المهنية التي صجونا فيها؟ راشد الدوسري- الخبر - الخافي اعظم! * استغرب يامعوكس تسألون رئيس اتحاد لعبة عن التصدي للاتهامات ومعاقبة اصحابها والوضع خارج سيطرته؟ تركي العنزي - تبوك - وخارج التغطية! * الاستاذ معوكس الظاهر الدعوى صارت موضة الكل يبي يخرج ويتبختر عبر الاعلام (انا قلت كذا والنادي الفلاني هو الاحق واعتذر اللاعب الفلاني وانا من جبت فلان وانا من فعل وسوى).. صراحة صار الوضع ماسخ اكثر من اللازم؟ عبدالله القطاني- ابها - لزوم التميلح! * العزيز معوكس ماودك تدخل في المعمعة وتعدل الحال المايل.. سمعت انك خبير وحلال مشاكل ولك نظرة ثاقبة تتميز بالبعد والحكمة؟ سعود الرشيد - الرياض - المعمعة مادام فيها ذا درب الزلق ماودي! * الأخ معوكس وش قصة التعاون مع التحكيم؟ سفير الحلة -الخبراء - قصة كابوريا والأسد! *صاحب المليون رسالة ابو العواكيس صديقي الغالي ودي أسألك لو احد ناداك وانت تتسوق او دق على جوالك وش تقول؟ أحمد الحمد - بريدة - معوكس لاتكلمني! * قاهرهم وحابس دمهم معوكس تكفى جاوبني بصراحة ليه الحكم الحنتوش ما انذر ولاعب نصراوي في مباراة الاتفاق انت وش تشوف؟ نواف الصيخان - حي الفلاح - اشوف المباراة اللي بعدها مع مين؟! * الاشهر والاملح ابو العواكيس وش دعوى ياصديقي طول الشهور الماضية وانا ارسل لك ومطنشني معقولة الآيملات ماتاصلك والفاكس عطلان حتى خويي ابوعبيد ماخذ على خاطره منك ويقول زعلان لايكلمني؟ صديقك المشتاق لك حمد الدوسري - ابومبارك - العزيزية - على راسي انت وابو عبيد وسوق الحمام وخلاص اقلبوها متسوق وكلمني! * عزيزي معوكس مساء الخير والاحساس والطيبة مانتب معي ان دكة احتياط الهلال تحتاج ضخ دماء شابه خاصة ان المنافسة تحتاج بدلاء على مستوى عالي جاهزين وبدون اصابات؟ بندر العصاد - عنيزة - يارجال اصبر عليهم ويضخون! * الغالي عكوسي مالاحظت ان المتحدث الرسمي بنادي الاتفاق ماعلق على اخطاء حكم مواجهة الفريق مع النصر رغم انها مؤثرة ونرفزة اللاعبين بعد نهاية المباراة والمتحدث هو نفسه اللي ازعج بتصاريحه بعد مبارة الهلال؟ محمد الدوسري - الدمام - شكله ما الحب ال اللحبيب الاول علشان كذا على الصامت! * الحبيب معوكس بدون مقدمات ودي تعلق على ذا التعليقات اللي في التويتر والبردوكسات اللي على الواتس اللي كلها شماتة وتخطت حدود الادب بين جماهير الهلال والنصر علشان صدارة وقتية والله عيب ابي نقدك الصريح ابو العواكيس؟ عبدالعزيز السعد - حي الشفاء - اتفق معك هبال وشي ابدا ما يشرف! * هلا الصديق الوفي معوكس ودي أسألك ليش احمد عيد ما كان صارم مع الاساءات الموجهه لنجمي المنتخب سالم الدوسري ونواف العابد يعني ماحس بخطورة الاتهام ولا وش السالفة؟ علي الصالح - الرس - السالفة الى صار خصمك القاضي من تقاضي! *عزيزي معوكس ما لاحظت ان حارس النصر بعد ماضموه للمنتخب نزل مستواه من اول مباراة قدام الاتفاق وبغى يجيب العيد عاشق العالمي ابو سلطان - الرياض - بغى يجيب العيد بالتعاون مع محمد عيد!
