فيه ذكرى للوطن مشهود ومخلد بيومه

غابت عيون الحسود وطلت عيون القصايد
لاح برق الشعر والمعنى سما يجمع غيومه
امطرت جزل البيوت وقمت انقيها فرايد
وصفها يشبه مواكب شيخ بالصدر معزومه
ابرك الايام يوم فيه للامجاد عايد
فيه ذكرى للوطن مشهود ومخلد بيومه
المؤسس قايد مامر مثله راس قايد
انتهض حر على شبه الجزيره طاب حومه
احتزم طير السعد والجيش من حوله سنايد
نصرته للدين واهل الدين ما يظلم خصومه
الملك عبدالعزيز موحد كل البدايد
دولة التوحيد مدروس هدفها من قدومه
اسس المبنى وفاء ما هو على مبنى حدايد
بالشجاعه والبراعه والكرم حدد رسومه
خلف عيال على نهجه وكل صار زايد
نهجهم ما خالف اطباعه ولا خالف سلومه
عهدهم عهد تميز بالرخا والامن سايد
المواطن في رغيد يعيش ويقضى له لزومه
ابو متعب بالعطايا قلد الشعب القلايد
خادم البيتين ندعي له عسى ربي يدومه
مكرماته كل يوم بالاذاعه والجرايد
ما تعد وتنحصى جملة قرارات محزومه
توسعاته للحرم تبهر وقول الناس شايد
والضيوف اللي يزورونه على العز مخدومه
له ولانا والولاء له كل ماصارت شدايد
لازهمنا عنده اقرب من جفونه وقت نومه
نايبه سلمان يسلم في قديمه والجدايد
الخصال الطيبه هي فيه ماهي بمعدومه
لازعل نزعل معه سلمان مافينا محايد
وان رضى نرضى معه سلمان والروس محشومه
يوم قامت بالدول ثورات.. نكبات ونكايد
كل ثورتنا تحالف مانخالف للحكومة
الفتن واللي وراها منعثر ماهوب صايد
هازمينه والعقول اللي تغذيه مهزومه
التحيه والمشاعر للوطن فوق النوايد
افتخر ماكني إلا بالفضاء والمس نجومه
والنهايه طاعة الله راس مال للفوايد
القصيده في نهايتها على المسك مختومه
شعر حمد الدليهي