صوت الصورة

وسط النفود الجيب يسحب كفرات
وفوق الكفر مترادفين النشامى
هذي وناستهم بروس الطويلات
واليوم صورتهم بصفحة خزامى
عبدالرحمن عبيد الحربي - الرياض
مدري وش المتعه ببعض الهوايات
خصوصاً اللي تعرضك الخطوره
سيارةٍ تسحبك فوق الكفرات
على طعوسٍ بين برد وحروره
يارب سترك من فراغ وتفاهات
ووقت نزايد من ترفهم شروره
عبدالعزيز الصالح – حائل
يلعب بَهَله اللعب قالوا بالأمثال
السابقين أهل السنع قايلينه
يا ساحِبٍ ربعك على الطِعس بحبال
ركْبوا كفر في سِلسلِه ساحبينه
منت بصغير تفهم العِلم رجّال
وعن الفسق تدْرِي نتايجه شينه
فهد بن عقيل الطويان – بريدة
اللي يسوق الجيب راعي طويله
يمشي على الهيّن ولاهوب مطفوق
يسحب تواير .. كم طفلٍ تشيله
يقرا عليهم سنّة الوِرْد ويسوق
سعد الحماد - روضة سدير
ياللي شريت الفكس من حر مالك
خليت جيبك لعبةٍ للوارعين
وبنصحك يا اللي وردت المهالك
احفظ حياتك واستمع هرجنا زين
فايز فرحان السويلم - فيضة بن سويلم
فك الحبل واطلق الرجلين
هذا تهور ماهو رياضه
فعلك خطر باينٍ للعين
من شغلك الناس مغتاضه
عبدالمحسن بن محمد الجريسي - الرياض
لاصرت بالبيد واجب منك تحتاط
تفحص بخبره جميع أمور موترك
أما الكِفْر سهلٍ للأعطال مطاط
إليا به استبنه وخوّه تقدرك
سعود عائش الحربي - القاهرة
يلعب طرب وسط الرمال الشريحه
على كفر واللاند يسحب كفرها
مدري تزلج فوق ارضٍ مريحه
ولا فراغ وما يحسّب خطرها
حمد عبدالله الوايلي - حوطة سدير
الجيب يمشي فوق متن الطعوسي
يجر حبلٍ شايلٍ له وراعين
يبي يصور مهملٍ في الدروسي
رمال وكنها قي عيونه بساتين
وائل عبدالله البلالي - الرياض
ما دري فراغ أو زود قوّه وطاقه
وإلا عليكم نقص لعب وملاهي
بالله فيدوا وقتكم يا رفاقه
لا يضيع وقتك بين ساهي ولاهي
عبدالكريم النغيمشي - الربيعية
العقل نعمة وهالفعايل أليمه
وفعلكم مرفوض وفكّر بالسلامه
عادةٍ يا شينها والله ذميمه
ما بها غير الخطر وأيضا الندامه
محمد عبد العزيز الخنيفر - أشيقر
شفت جيبٍ جديدٍ في موديله
ابيض اللون بخزامى الصحاري
منظره حزّ بالنفس وكواها
يوم شفت الخطر خلفه يجره
خلفه بزور ما تعرف خطاها
والخطا شايفه كاتب وقاري
يا شباب الوطن هذي رساله
واحدٍ ما يريد الكم مضره
سعود بن سعد الحافي - الرياض
ياللي على الكفر يسحبك
أبوك من فوق سياره
وأخوك مقدي مصورك
وينشر أخبارك الساره
ماضي بن زيد القضاعي - الشعراء
ياراعي الجيب وش صابك
وش فيك تسحب وراعينك
شغلك خطا قويها اعصابك
وين انت والصح يا وينك
لو هو حصل شي بأسبابك
ندمت وتغرك يدينك
مبارك بن محمد بن طرجم - وادي الدواسر
يامن تلوح بالنصر والشهاده
من داخل الشنطه عساكم تعودون
افزع قبل النكد والنكاده
الليل عسعس لا تماطل تضيعون
علي جابر آل زولان الفيفي - بيشة
الجيب بنشر وفيه اسبير
والربع صاروا يفكونه
وحنا بلدنا هل تقدير
واللي تعطل يشيلونه
عبدالكريم عبدالرحمن السلوم - القرائن
هذا الخطر .. هذا الخطر .. والخطوره
ترفيهكم يا ناس ماهوب ترفيه
فوق الكفر مسحوب ماهيب كوره
احذر طعوس الرمل .. والرمل غاطيه
عبدالمحسن بن محمد المحيسن - رياض الخبراء
تبي تزلج صح سافر لوربا
فوق السفوح العاليه يسحبك خيل
صحرا الجزيره فيها موتٍ مخبا
غير الخطر ذا الجيب هلكو رجاجيل
سعود بن عبدالعزيز الهزاع - نعام
صورة العدد من جملة صور بعث بها القراء للزاوية
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
زاوية ( صوت الصورة )
ونرحب بالصور الهادفة والطريفة