أهل التكبّر مالهم قابلية

اللي يجي من صاحبي دوم مقبول
وابا التمس له عذر يمحى الخطيه
الا الغرور وشوف نفسه على طول
يمحى غلاه ولا يبقّي بقيه
ماعاد له في قلبي اعذار وحلول
ومانيب مستحمل غروره عليه
عزيز نفس ولو يجي منه مرسول
والله مايقدر يحل القضيه
هموم هالدنيا تشيّلني حمول
وتبقى بقلبي طول عمري خفيه
مانيب ناقص شوفة النفس من زول
اعيش له دايم حياةٍ شقيه
وش زاد عن غيره من الناس ياحّول
اللي غروره طال حتى خويه
مانيب عن طبع المخاليق مسؤول
ومانيب ضايع بين كل البريه
الحق بين الناس ماهوب مجهول
اهل التكبّر مالهم قابليه
اببتعد عنهم ولا نيب مكفول
باللي عزومه بالصداقه رديه
وبفضل ربي فيني الكبر مقتول
واعيش من دونه حياةٍ هنيه
واللي يجي من صاحبي دوم مقبول
الا الغرور يصير ظلم وخطيه