علقت اسمك بالسما فوق تمثال

كنت أرسمك في دفتري رسم الأطفال
لين الورق من صورتك قد مليته
أرسم وأغير بالملامح والأشكال
وأقول معقولة حبيبي نسيته
أثر الخفوق لغيرك اليوم محتال
يقرى عن العذال شي ماقريته
ماوده أحدن يعرفك من هل القال
اللي تشب النار وتصب زيته
وأنا مثل من كان ياقف بالأطلال
يذكر حبيبن ضيع البعد بيته
يوم الهبوب تلاعب الشوق بالشال
ويومن بسام العمايم رميته
ويومك تخبي خاتمك خلف الأقفال
ويومني أضحك وأحلف اني لقيته
علقت أسمك بالسما فوق تمثال
ومن دم عاشق بالمحبة طليته
واليوم مال الوقت والحب مامال
وأقفيت في دربن بعيدن مشيته
وقيدك سجان المشاعر بالأغلال
وعطاك مرسول الحزن ماعطيته
لّبست هجرك يالغلا ثوب الأسبال
وجسم المواصل عاريا ماكسيته
لولاك ماعلقت نفسي بالآمال
ولولاك ياليل العنا ماسريته
لكن أنا بسألك ياطيب الفال
قلي وش اللي من فراقي خذيته
وأبسألك يازين وأعرفك من (......)
عرق الجفا والبعد من وين جيته
وإذا السؤال بيحرجك عند الأنذال
أنسى سؤالي واعتبرني نسيته
واعرف بأن الوقت لو طال لو طال
تبقى حبيبن زود البعد صيته
ماجد عبدالله المحياني