سبع خرزات

ما خذى الطوله سوى من كان بالدنيا عصامي
وما رضى بالضيم غير اللي همومه كايدات
وما كتم حر اللهايب بنسمه غير القطامي
والليالي ما تحاكي الا القلوب المرهفات
وانت ياللي من عرفتك ناسي حتى سلامي
الله اقوى بالشدايد لو ضعف حيلي ومات
ما بذرت الا الهموم وما حصدت الا عظامي
وما كسبت الا سماحة وجهي ووطية ثبات
والفقير ولو قضى عمره يدور بالمكامي
عن بقية عيشته، ابرم عليه من العطاة
بارك الله بالمدى لو كان قصر عن مرامي
دامي المح صورتي تغلب عليها الامنيات
الحظوظ حظوظ رب رمية، من غير رامي
والقنوع اللي ينام ولا حسب هم الحياة
ميه ياقلبي تجمل بالصبر واوعدك دامي
عايش.. لتشوف يوم به جروحك باريات
يسمح امرك لو شربت من السحاب وصرت ضامي
هو بقى بالعمر غير حساب خطوات الممات
النوايب لو لها بقفايتك ذكر واسامي
كان ما شفت الهقاوي تشبه عزوم البنات
لا تحسب اني انكسرت ولو وقع مني حزامي
برجع اوقف دام باقي بظهري سبع خرزات!!
صالح العبدالكريم